Rezonansty isterdiń jaı-japsary: UQK derekti fılm jarııalady
ASTANA. KAZINFORM — Ulttyq qaýipsizdik komıteti Sybaılas jemqorlyqqa qarsy is-qımyl qyzmetiniń jumysy týraly derekti fılm usyndy. Fılmde arnaıy operatsııalardyń kadrlary, tintý barysynda túsirilgen beınematerıaldar jáne qoǵamda rezonans týdyrǵan qylmystyq isterdiń jaı-japsary kórsetilgen.
Fılmde aıtylǵandaı, bul qyzmet memlekettik basqarý júıesin reformalaý aıasynda quryldy. Soǵan sáıkes sybaılas jemqorlyq qylmystarynyń aldyn alý, anyqtaý, jolyn kesý jáne tergeý fýnktsııalary Ulttyq qaýipsizdik komıtetine berildi.
QR UQK Sybaılas jemqorlyqqa qarsy is-qımyl qyzmetiniń dırektory Nurjan Qusaıynovtyń aıtýynsha, búginde sybaılas jemqorlyq tek qylmystyq-quqyqtyq másele ǵana emes.
— Urlyq jasaý, laýazymdyq ókilettikterdi teris paıdalaný jáne qyzmettik jaǵdaıdy jeke maqsatqa qoldaný ekonomıkanyń damýyna, memlekettik basqarýdyń tıimdiligine jáne qoǵamdyq turaqtylyqqa qaýip tóndiredi. Sondyqtan bizdiń mindetimiz — memlekettiń strategııalyq múddelerine, memlekettik resýrstarǵa jáne ekonomıkalyq qaýipsizdikke qaýip tóndiretin sybaılas jemqorlyq táýekelderin der kezinde anyqtap, jolyn kesý, — dedi ol.
Derekti fılmde qoǵam nazaryn aýdarǵan birneshe qylmystyq is týraly da aıtylady.
Sonyń biri — Jaqsylyq Omarǵa qatysty is. UQK málimetinshe, 2025 jyldyń sońynda komıtet qyzmetkerleri onyń burynǵy qaramaǵyndaǵy qyzmetkerler men vedomstvolyq uıymdardyń ókilderinen júıeli túrde aqsha talap etkeni týraly aqparat alǵan. Tergeý barysynda kúdiktiniń qyzmet babynda ósirýge ýáde berip, bas tartqan jaǵdaıda jumystan shyǵaramyn nemese laýazymyn tómendetemin dep qysym kórsetkeni anyqtalǵan.
Tergeý aıasynda kúdiktiniń úıine tintý júrgizilip, aqsha tárkilengen. Alǵashqy jaýap alý kezinde ol advokatynyń qatysýymen kinásin moıyndaǵan. Tergeý barysynda alaıaqtyqqa qatysty qosymsha derek anyqtalyp, sot Jaqsylyq Omardy alty jylǵa bas bostandyǵynan aıyrdy.
Fılmde sondaı-aq Batys Qazaqstan oblysy boıynsha Memlekettik kirister departamenti laýazymdy tulǵalaryna qatysty is qamtylǵan.
Tergeý nusqasyna sáıkes, basqarma basshylarynyń biri deldal arqyly sheteldik kásipkerden Qazaqstan aýmaǵyna halyq tutynatyn taýarlardy kedergisiz ótkizý úshin para alyp otyrǵan.
Tintý barysynda 400 myń AQSh dollarynan astam qarjy, 55 mln teńge tárkilenip, úsh avtokólikke tyıym salynǵan. Sondaı-aq sheteldik kásipkerge qatysy bar 38 kompanııa anyqtalyp, olardyń shamamen 15-i 1,9 mlrd teńge kóleminde salyq tóleýden jaltarǵany belgili boldy. Qazir bul is sotta qaralyp jatyr.
Budan bólek fılmde densaýlyq saqtaý, áleýmettik qorǵaý jáne memlekettik qyzmet kórsetý salalaryndaǵy sybaılas jemqorlyq faktileri sóz bolady. Epızodtardyń birinde ımporttyq medıtsınalyq buıymdardy otandyq ónim retinde kórsetip, memleketten zańsyz tólem alýǵa árekettengen shema áshkerelengeni aıtylady. UQK mundaı zańsyz áreketter bıýdjet qarajatynyń tıimsiz jumsalýyna, medıtsınalyq kómektiń sapasyna keri áser etip, azamattardyń memlekettik ınstıtýttarǵa degen senimine nuqsan keltiretinin atap ótti.
Fılmde keltirilgen málimetke sáıkes, Sybaılas jemqorlyqqa qarsy is-qımyl qyzmeti qurylǵannan beri 738 sybaılas jemqorlyq quqyq buzýshylyǵy tirkelgen. Onyń ishinde 538 para alý, 70 alaıaqtyq, 51 jymqyrý, 47 senip tapsyrylǵan múlikti ıemdený nemese ysyrap etý jáne 13 laýazymdyq ókilettikti asyra paıdalaný faktisi bar.
Búginde 691 qylmystyq is boıynsha tergeý aıaqtalyp, onyń 583-i sotqa joldanǵan. Memleketke keltirilgen zalal kólemi 21 mlrd teńge. Onyń 4,3 mlrd teńgesi bıýdjetke qaıtarylyp, quny 13,7 mlrd teńgeniń múlkine tyıym salynǵan.
Aıta keteıik, buǵan deıin prokýratýra men sybaılas jemqorlyqqa qarsy qyzmetke qabyldaý erejesi ózgerýi múmkin ekenin jazdyq.
