Rezıdent emesterdiń tabysyn taný merzimine qoıylatyn talaptardy jumsartý usynyldy
ASTANA. KAZINFORM - Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken Salyq kodeksin engizý jónindegi jobalyq keńseniń 13-shi otyrysynda Qazaqstannyń rezıdent emesteriniń avans boıynsha mindettemeleri túrindegi kiristerin taný merzimderi men sharttary qaraldy.
«Atameken» UKP tóraǵasynyń orynbasary Tımýr Jarkenov atap ótkendeı, jańa Salyq kodeksinde (679-baptyń 1-tarmaǵynyń 5-tarmaqshasy) mundaı tabysty taný merzimi 24 aıdan 12 aıǵa deıin qysqartyldy. Eger beırezıdent mindettemelerin avans tólengen kúnnen bastap 12 aı ishinde ne avans tólegen zańdy nemese jeke tulǵa taratylǵan kúnge deıin oryndamasa, tabys halyqaralyq sharttyń bolýyna jáne kelisimsharttyń qoldanylý merzimine qaramastan alyndy dep tanylady.
Bul norma kapıtaldy kóp qajet etetin jáne uzaqmerzimdi jobalar úshin, onyń ishinde munaı hımııasyna jáne júzege asyrý merzimi 12 aıdan asatyn K-5/Eýro-5 standartty otyn komponentteriniń óndirisine anaǵurlym áser etkish bolyp keledi.
Talqylaý barysynda salyq organdary merzimderdi uzartý kezinde teris paıdalaný táýekelderi bar ekenin jetkizdi.
Jıyn qorytyndysynda Salyq kodeksine iri ınvestıtsııalyq jobalardy júzege asyratyn ınvestorlar úshin, sondaı-aq áýe kemelerin satyp alatyn avıakompanııalar úshin erekshelik túrinde rezıdent emesterdiń kiristerin taný merzimin uzartý múmkindigin kózdeıtin ózgeristerdi engizý týraly sheshim qabyldandy.
Mundaı erekshelikterdi qoldaný qajettiligi beıindi salalyq mınıstrliktiń qorytyndysymen rastalatyn bolady.
Osyǵan deıin qarjy sektorynda salyq erejeleri jańartylyp, birqatar jeńildik qarastyrylǵany týraly jazdyq.
