Rezıdent dárigerler 20 jańa balalar baǵyty boıynsha bilim ala alady
ASTANA. KAZINFORM — Rezıdentýranyń birqatar suranysqa ıe mamandyǵy boıynsha daıarlyqtyń balalar beıinin engizý josparlanyp otyr. Bul týraly DSM baspasóz qyzmeti habarlady.
Balalarǵa medıtsınalyq kómektiń sapasyn arttyrý maqsatynda Densaýlyq saqtaý mınıstrligi dárigerlerdi daıarlaý júıesindegi mańyzdy ózgeristerge bastamashylyq jasaıdy.
— Rezıdentýranyń birqatar suranysqa ıe mamandyǵy boıynsha daıarlyqtyń balalar beıinin engizý josparlanyp otyr. Bul bolashaq dárigerlerdiń pedıatrııa salasyndaǵy tereń mamandanýyna nazar aýdarýǵa jáne arnaıy beıindi balalar mamandarynyń tapshylyǵyn azaıtýǵa múmkindik beredi. Bul ınnovatsııanyń negizgi dáleli aýrýdyń anatomııasyndaǵy, fızıologııasyndaǵy, klınıkalyq kórinisterindegi, sondaı-aq eresekter men balalardy dıagnostıkalaý men emdeý ádisterindegi aıyrmashylyqtar boldy. Innovatsııa zamanaýı bilim men klınıkalyq tájirıbege súıene otyryp, balalar aýrýlaryn dıagnostıkalaý, emdeý jáne aldyn alý isinde keshendi jáne naqty tásildi qamtamasyz etýge múmkindik beredi, — delingen mınıstrlik habarlamasynda.
Jańartylǵan daıarlyq júıesi sheńberinde rezıdent dárigerler 20 jańa balalar baǵyty boıynsha bilim ala alady, olardyń ishinde:
— balalar kardıologııasy jáne kardıohırýrgııasy
— balalar anestezıologııasy
— balalar ınfektsııalyq aýrýlary
— balalar neırohırýrgııasy
— balalar pýlmonologııasy
— balalardyń jaq-bet hırýrgııasy
— balalar nefrologııasy jáne basqa da mamandyqtar.
Rezıdentýrany uıymdastyrýdaǵy jańa tásilder otandyq densaýlyq saqtaýdy jańǵyrtýdyń mańyzdy qadamy bolady jáne balalarymyzǵa medıtsınalyq kómektiń sapasy men qoljetimdiligin arttyrýǵa múmkindik beredi.
Aıta ketelik el halqynyń densaýlyq jaǵdaıy týraly statıstıkalyq jınaq jaryq kóretini týraly jazǵan edik.