Rejısser Jánibekov advokatynan bas tartty
ALMATY. QazAqparat - «FENIKS» fılmine bólingen qarajatty qoldy etti dep aıyptalyp otyrǵan fılm rejısseri Talǵat Jánibekov advokat aýystyratynyn málimdedi, dep habarlaıdy QazAqparat tilshisi.
Almaty qalasy Medeý aýdandyq sotynda «Fenıks» fılmi boıynsha taraptardyń jaryssózi búgin Talǵat Jánibekovtiń advokaty Serik Aıtbaevtyń aýyryp qalýyna baılanysty mamyr aıynyń 22-sine shegerildi.
Sotta sýdıa Táken Shákirov qylmystyq isti advokattyń qatysýynsyz ótkize almaıtynyn eskertti.
«S. Aıtbaev elektrondy poshta arqyly ótinimhat berip, sot protsesin onyń qatysýynsyz ótkizýdi nemese keıinge shegerýdi surapty. Densaýlyǵyna baılanysty eńbekke jaramsyzdyq paraǵyn keıin ákeletinin jazǵan. Ol sizdermen habarlasty ma, qaıda?», - dep surady sýdıa Talǵat Jánibekovtiń jarynan.
Rejısserdiń aǵaıyndary advokatpen habarlasa almaı otyrǵanyn, telefonyna jaýap bermeıtinin aıtyp, basqa advokat jaldaıtyndaryn málimdedi.
Sýdıa Táken Shákirov aıyptalýshy rejısser Jánibekovtiń óziniń pikirin surady.
«Aýystyramyz», - dep jaýap berdi rejısser.
Eske sala keteıik, Sybaılas jemqorlyqqa qarsy is-qımyl ulttyq bıýrosynyń málimeti boıynsha «Fenıks» kórkem fılmin túsirýge arnalǵan 79 mln teńge kólemindegi bıýdjet qarajaty «T.K.TURAN UNIVERSAL BUSINESS» JShS esep-shotyna aýdarylyp, onyń 69 mln teńgesi urlanǵan. Al atalǵan fırmanyń quryltaıshysy - kartınanyń bas prodıýseri Tuńǵyshbaı Jamanqulov. Qazirgi ýaqytta sottalýshylar oryndyǵynda 9 adam otyr: olar «Fenıks» kınokartınasynyń bas prodıýseri, halyq ártisi Tuńǵyshbaı Jamanqulov, kınofılmniń rejısseri Talǵat Jánibekov, atqarýshy prodıýseri Natalıa ıÝdına, redaktory Ǵızat Sultanov, «Fenıkstiń» daıyndyq kezeńindegi túsirilim tobynyń dırektory Márlen Ábishev, «Sh. Aımanov atyndaǵy «Qazaqfılm» kınostýdııasy» AQ-nyń top-menedjeri Gaýhar Ysqaqova, jaýapkershiligi shekteýli seriktestiktiń ókili Danııar Ábdiqadyrov, jeke kásipker Ilıa Korobeınıkov jáne kınokartınanyń ekinshi rejısseri Bıjan Ábishev.
