Rejısser Rob Raıner men áıeliniń qazasy: olardyń uly ólim jazasyna kesilýi múmkin
ASTANA.KAZINFORM — Ata-anasyn, rejısser Rob Raınerdi jáne fotograf Mıshel Sıngerdi óltirdi degen kúdikpen qamaýǵa alynǵan Nık Raıner alǵashqy sot otyrysyna qatysty, dep habarlaıdy Kazinform agenttigi.
PBS-diń habarlaýynsha, Nık Raınerge ata-anasynyń ólimine qatysty birinshi dárejeli kisi óltirýdiń eki baby boıynsha aıyp taǵyldy.
Biraq 32 jastaǵy azamat kinásin moıyndamady.
Advokatynyń ótinishi boıynsha aıyptaý 7 qańtarǵa deıin keıinge qaldyryldy.
— Biz sizden júıeniń osy protseste kózdelgendeı damýyna múmkindik berýińizdi suraımyz. Asyǵys qorytyndylarsyz, merziminen buryn úkimdersiz, — dedi Nık Raınerdiń advokaty.
Birinshi dárejeli kisi óltirýdiń eki baby erekshe jaǵdaılarmen qatar júredi: birneshe kisi óltirý jáne aıyptalýshynyń qaýipti qarý — pyshaq qoldanǵany týraly aıyptaý. Bul qosymsha jaǵdaılar qatań jazaǵa ákelýi múmkin.
Prokýratýra rejısser men onyń áıeli pyshaqtalyp óltirilgen degen qorytyndyǵa keldi.
Eger Nık Raıner kináli dep tanylsa, ol shartty túrde merziminen buryn bosatylmaı ómir boıy bas bostandyǵynan aıyrylýy nemese ólim jazasyna kesilýi múmkin.
Los-Anjeles okrýginiń prokýrory Natan Hohman óz keńsesi bul is boıynsha ólim jazasyn qoldaný týraly sheshim qabyldamaǵanyn aıtty.
Esterińizge sala keteıik, rejısser jáne akter Rob Raıner men onyń áıeli Mıshel Sınger Raıner Los-Anjelestegi úılerinde tabyldy.
Olardyń ortanshy uly, ákesi rejısserlik etken «Charlı bolý» fılminiń stsenarısi Nık Raıner kisi óltirdi degen kúdikpen tutqyndaldy.
Amerıkalyq BAQ-tyń habarlaýynsha, Nık Raıner kisi óltirýden bir kún buryn Gollıvýdtaǵy keshte ata-anasymen urysyp qalǵan.
Rob Raıner 20-ǵa jýyq fılm túsirgen, onyń ishinde «Garrı Sallımen kezdeskende», «Birneshe jaqsy adam» jáne «Amerıkalyq prezıdent» sııaqty kýlttik klassıkalyq fılmder bar, al onyń akterlik sheberligi «Sıetldegi uıqysyzdyq», «Ýoll-strıt qasqyry» fılmderinde anyq baıqalady.
