Rejısser Olıver Stoýnnyń uly musylmandyqty qabyldady
ASTANA. 15 aqpan. QazAqparat - «Ýoll Strıt» jáne «Aleksandr» fılmderiniń avtory Olıver Stoýnnyń úlken balasy jalpaq álemdi tań qaldyrdy. Jas azamat keshe Irannyń Isfahan qalasynda ıslam dinin qabyldady, dep habarlaıdy aqparat agenttikteri.
Rásim kezinde 27 jasar Shon Krıstofer Stoýn Álı esimin aldy. Ol ıslamnyń sheıittik jolyn tańdapty, dep jazady Ýtro.rý.
«Oskarlatqysh» rejısserdiń balasy Iranda el prezıdenti Mahmud Ahmadınejad óte jaqsy kóretin parsynyń tylsym aqyny Djalalıddın Rýmı týraly fılm túsirip jatyr eken. Jas azamattyń dinin aýystyrýyna musylman mádenıetimen etene tanysýy túrtki bolǵan-bolmaǵany ázirshe belgisiz.
«Islamdy qabyldaýym ózim dúnıege kelgeli ustanyp kelgen hrıstıandyq nemese ıýdaızmnen bas tartýym emes. Bul meniń Muhammed paıǵambardy jáne basqa paıǵambarlardy qabyldaǵandyǵymdy bildiredi», - dedi Shon Stoýn jýrnalısterge. Tanymal rejısser bala kezinde kartınalaryna jıi túsetin tuńǵyshynyń bul áreketi týraly ázirge tis jarmaıdy.
