Rejısser Berik Jahanovtyń eki fılmi Qazandaǵy kınofestıvalge qatysady
ALMATY. QazAqparat - Qysqametrajdy «Asan» kórkem fılmi jáne «Ata kásip» derekti fılmi 24-30 sáýir aralyǵynda Tatarstannyń astanasynda ótetin XV halyqaralyq musylman kınosy festıvaliniń konkýrsyna qatysady, dep habarlaıdy QazAqparat «Qazaqfılm» kınostýdııasyna silteme jasap.
Atalǵan kınolar «Úzdik qysqametrajdy fılm» jáne «Úzdik derekti fılm» nomınatsııalary boıynsha baq synaıdy. Bul týyndylar QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirildi.
Musylman kınosy festıvaliniń quryltaıshysy - Tatarstan Respýblıkasynyń Mádenıet mınıstrligi. Atalǵan is-shara Tatarstan kınematografıster odaǵy men Qazan memlekettik mádenıet ınstıtýtynyń uıymdastyrýymen ótedi. Bıyl festıvaldiń konkýrsyna túsken fılmderdi Danııa, Ońtústik Koreıa syndy 10 memlekettiń belgili kınematografısteri baǵalaıtyn bolady.
«Asan» qysqametrajdy fılmi ákesin aqtyq saparǵa shyǵaryp salýǵa jolǵa shyqqan bozbala týraly baıandaıdy. Al «Ata kásip» derekti fılmi Qazaqstanda turatyn ózbek halqy týraly, onyń ishinde Ońtústik Qazaqstan oblysynda turatyn ózbek halqynyń ókili, ata kásip - besik jasaýmen aınalysatyn qyryq jeti jasar Abdımannop Zýparov esimdi sheberdiń ómirin baıandaıdy.
«Osy festıvalde meniń eki birdeı fılmderimniń kórsetiletinine qýanyshtymyn. Maǵan senip, qoldaý bildirgenderi úshin «Qazaqfılm» kınostýdııasynyń basshylyǵyna alǵysymdy aıtamyn», - dedi fılmderdiń rejısseri Berik Jahanov.
Esterińizge sala ketsek, byltyr «Asan» fılmi 71-shi Halyqaralyq Kann kınofestıvaliniń Short Film Corner aıasynda (álemniń qysqametrajdy týyndylaryna arnalǵan) kórsetilgen bolatyn. Sonymen qatar 2018 jyly kartına birneshe halyqaralyq kınofestıvalderge qatysyp, kóptegen júldelerge ıe boldy, atap aıtsaq, respýblıkalyq «Baıqońyr» festıvalinde «Úzdik akter» júldesimen, Bakýde ótken 9-shy Halyqaralyq Start film festival kınofestıvalinde qazylar alqasynyń arnaıy júldesimen, «Úzdik qysqametrajdy fılm» nomınatsııasy boıynsha «Qulager» júldesimen, Tashkentte ótken «Prolog» kınofestıvalinde arnaıy júldemen jáne Ekaterınbýrg qalasynda ótken XV Halyqaralyq «Kınoproba» kınomektebi festıvalinde qazylar alqasynyń arnaıy júldesimen marapattaldy.
Al «Ata kásip» derekti fılmi de birneshe júldelerge qol jetkizgen bolatyn. Byltyr Almatyda ótken VII Halyqaralyq «Bastaý» kınofestıvalinde derekti fılm Oraz Ábishev atyndaǵy júldeni ıemdendi. Sondaı-aq Baýyrjan Nógerbektiń 70 jyldyǵyna arnaıy uıymdastyrylǵan kınofestıvalde qazylar alqasynyń júldesimen jáne Vosmerka.kz saıtynyń arnaıy júldesimen (taqyrypqa tereń úńilip, derekti fılmderdi túsirý dástúrine bar yqylaspen berilgen úshin) marapattaldy.
