Rejısser B. Atabaevtyń paıymdaýynsha, dramatýrgııanyń damýyna ádebı til kedergi bolyp tur
ALMATY. 10 qarasha. QazAqparat /Erlik Erjanuly/ - "Aqsaraı" mıýzıkl teatrynyń kórkemdik jetekshisi Bolat Atabaevtyń paıymdaýynsha, dramatýrgııanyń damýyna ádebı til kedergi bolyp otyr. Ol bul oıyn QazAqparat tilshisimen tildesýinde bildirdi.
Rejısserdiń aıtýynsha, kóp pesalar bizde oqý úshin ádebı tilde jazylady. Ondaǵy keıipkerler ómirdegideı sóılemeıdi.
"Ádebıet pen dramatýrgııa jeke-jeke janrlar. Barlyq kezde de teatrda ádebıetten qashan qutylamyz degen áńgime shyǵyp turǵan. Qazir de bul ózekti máselege aınaldy. Ol úshin dramatýrgııa oqý úshin emes, sahna úshin jazylýy kerek. Búgingi tańda teatrlarda aýdarma qoıylymdardyń kóptigi olardyń sahna úshin jazylýynan bolýy múmkin. Jalpy bizge qazir aǵartýshylyq jáne saıası teatrlar kerek dep oılaımyn. Kóp máselelerde áli de jurttyń saýatyn ashý qajet", - deıdi B.Atabaev.
Onyń paıymdaýynsha, qazir sany bar sapasy joq teatrlar kóp. Bári bir-birinen aýmaıdy. Osy oraıda ol "bul rejıssýranyń da, trýppanyń da kinási" ekenin aıtty. "Olar ózgergisi kelmeıdi. Sahnada jasandy, jalǵan sózder kóp. Ókinishtisi sol, biz kóp jaǵdaıda teatrdan tek tárbıeni izdeımiz. Bul shyǵarmanyń tárbıelik máni nede dep suraımyz. Al ónerdiń odan basqa da qyzmetteri bar ǵoı. Estetıkalyq, qarym-qatynastyq, tanymdyq degen sııaqty. Ónerge tek qana tárbıe orny dep qaramaý kerek", - deıdi B. Atabaev.
"Qazir biz Murat Telebaevtiń "Eıfel baıdyń munarasy" degen pessasyn daıyndap jatyrmyz. Aldaǵy qańtar aıynda sahnaǵa shyǵarylýy múmkin. Búgingi tańda óner, mádenıet ekinshi sort degen tárizdi kózqaras bar. Rýhanııat máselesi áli qolǵa alynbaı jatyr. Rýhanı negizi joq adam qalaı jaqsy saıasatker, ekonomıst bolady. Onsyz jemqorlyq pen sybaılastyqtyń tamyryna balta shabylmaıdy. Rýhanı negizi joq qoǵamnyń ómiri de baıansyz", - deıdi B. Atabaev.
