Rejısser «Almas qylyshty» Qytaıdaǵy qandastarymyzǵa kórsetýge qatysty ótinishke jaýap berdi
ASTANA. QazAqparat - Qazaqstanda "Qazaq xandyǵy. Almas qylysh" fılmi prokatqa shyqqannan keıin Qytaıdaǵy qandastarymyz eleń etip, fılmdi qashan jáne qaıda kóre alatyndaryn surap, ony sol jerde prokatqa shyǵarý máselesin sheshýdi ótingen edi. QazAqparat tilshisine suxbat bergen rejısser Rústem Ábdirash qandastarymyzdyń osy bir ótinishine jaýap berdi.
"Bunyń bári dıstrıbıýtorǵa baılanysty. Bizde myna jaqta bir dıstrıbıýtor bolǵan. Qazir sony taba almaı otyrmyz. Qytaı jaqta júr-aý deımin. Sol jaqtan dıstrıbıýtor bolamyz dese, biz daıynbyz. Qytaıdyń barlyq aýdandaryna shyqpaı-aq qoıaıyq, eń bastysy, Úrimshi jaqtaǵy dıstrıbıýtsııaǵa ótkizýge adam bolsa, kelisimshartty rásimdep, fılmdi aparyp kórsetýge bolady", - deıdi Ábdirash.
Rejısserdiń sózine qaraǵanda, bas kezinde usynystar bolǵan. Biraq aldymen Qazaqstandaǵy prokatty rettep alý qajet edi. Endigi kezekte san alýan festıvalder arqyly fılmdi shetelge shyǵarý, múmkindik bolsa, prokatqa shyǵarý sharalary qolǵa alynady.
"Eger Qytaı jaqtaǵy qazaqtardan dıstrıbıýtor bar, ózimiz kórsetemiz dep, usynys jasasa, biz kezdesip, kelisimshartqa otyrýǵa ázirmiz. Óıtkeni Qytaıda da bıýrokratııa bar. Ol jaqta prokatqa shyǵý úshin kvota qajet. Al sol jaqtaǵy qazaqtardyń ishinde sózi ótetin azamattar tabylsa, fılmdi tezdetip kórsetýge bolady. Biz óz tarapymyzdan daıynbyz", - dep atar kórsetti rejısser.
Aıta keteıik, qańtardyń 5-si kúni «Qazaq handyǵy. Almas qylysh» fılmi prokatqa shyqqan bolatyn. "QazAqparat" HAA tilshisi tarıhı týyndyny kınoteatrdan birinshi bolyp tamashalaǵan kórermenderdiń pikirin jazyp alǵan edi. Rejısser Rústem Ábdirashtyń ózi halyqtyń oı-pikirin bilý maqsatynda kınoteatrlardy jasyryn aralap júrgenin jetkizgen.
