Rejep Taıyp Erdoǵan Astanada strategııalyq yntymaqtastyq keńesiniń otyrysyna qatysady
ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Túrkııa Prezıdentiniń Qazaqstanǵa memlekettik sapary qalaı ótetinin aıtty, dep habarlaıdy QazAqparat tilshisi.
«Qazaqstan Respýblıkasynyń Prezıdenti Qasym-Jomart Toqaevtyń shaqyrýymen Túrkııa Respýblıkasynyń Prezıdenti Rejep Taıyp Erdoǵan bıylǵy 12-13 qazanda Qazaqstanǵa memlekettik saparmen keledi. Sapar aıasynda 12 qazanda qos memleket basshylarynyń ekijaqty kezdesýi, sondaı-aq Qazaqstan men Túrkııa arasyndaǵy joǵary deńgeıdegi strategııalyq yntymaqtastyq keńesiniń 4-shi otyrysy ótedi», - - dedi Aıbek Smadııarov mınıstrlikte ótken brıfıngte.
Kelissóz barysynda ózekti óńirlik jáne halyqaralyq máseleler boıynsha pikir almasyp, taraptar ekijaqty ınvestıtsııalyq jáne saýda-ekonomıkalyq yntymaqtastyqtyń perspektıvalaryn talqylaıdy.
Sonymen birge, Túrkııa Respýblıkasynyń basshysy Azııadaǵy ózara is-qımyl jáne senim sharalary jónindegi keńestiń VI sammıtine de qatysady.
Aıta keteıik, bul aptada Qatar, Túrkııa jáne Túrikmenstan basshylary Qazaqstanǵa memlekettik saparmen keledi.
