Rejep Taııp Erdoǵan Túrikmenstandy TMU-ǵa tolyqqandy múshe bolýǵa shaqyrdy

Astanada ótip jatqan Túrki memleketteri uıymynyń H sammıtinde Túrkııa prezıdenti Rejep Taııp Erdoǵan Túrikmenstandy TMU-ǵa múshe bolýǵa shaqyrdy, dep habarlaıdy Kazinform agenttigi.

«Aldyńǵy sammıtte Soltústik Kıpr túrki respýblıkasy baıqaýshy mártebesin aldy. Osy tarıhı sheshim úshin rahmet aıtamyz. Osy sheshimmen túrki álemi barshaǵa mynany kórsetti – Kıpr túrkileri oqshaýlanyp qalsa da, jalǵyz emes ekendigin búkil álemge kórsettik. Bizdiń mindetimiz – birlestikte jumys isteý. Kıpr túrkileri túrki otbasynyń ajyramas bóligi. Kelesi sammıtte Soltústik Kıprdiń túrki respýblıkasyn uıymǵa baıqaýshy retinde kóremiz degen úmittemiz», - dedi Túrkııa basshysy.

Budan keıin ol Túrikmenstan tarabyna talaıdan beri aıtylyp júrgen usynysty eske saldy.

«Taǵy da qaıtalap, basa aıtqym keledi. Bizdiń baıqaýshy-múshemiz Túrikmenstandy tolyqqandy múshe retinde kórgimiz keledi. Bizdiń negizgi uranymyz: «Bizdiń birligimiz – bizdiń kúshimiz». Túrki álemin ártúrli salalarda neǵurlym kúsheıtkimiz keledi. Sondaı-aq, ártúrli synaqtarǵa neǵurlym tózimdi ári beıimdelgish etkimiz keledi. Biz basshylar retinde túrki álemin birlik pen yntymaqqa qaraı baǵyttaýymyz kerek», - dedi Túrkııa prezıdenti.

Eske salaıyq, búgin Astanada Túrki memleketteri uıymynyń H sammıti ótip jatyr. 

Jıynǵa Túrkııa, Ázerbaıjan, Ózbekstan, Qyrǵyzstan prezıdentteri uıymǵa múshe memleket basshylary retinde, Majarstan Premer-mınıstri men Túrikmenstan basshysy baqylaýshy eldiń basshylary retinde qatysýda.

TMU sammıti «Túrki dáýiri» uranymen ótedi. 

Búgin Syrtqy ister mınıstrliginde Túrki memleketteri uıymynyń syrtqy ister mıınstrleri keńesiniń jabyq otyrysy ótti.

Sharada QR Syrtqy ister mınıstri Murat Nurtileý Izraıl-HAMAS qaqtyǵysyndaǵy Qazaqstan ustanymyn aıtty.