Rejep Taııp Erdoǵan: Túrki keńesiniń 8-shi sammıti Ystanbulda ótedi

NUR-SULTAN. QazAqparat – Túrki tildes memleketterdiń yntymaqtastyq keńesiniń 8-shi sammıti 2021 jyldyń 12 qarashada Ystanbulda ótedi. Bul týralyTúrki keńesiniń beıresmı sammıti barysynda Túrkııa Prezıdenti Rejep Taııp Erdoǵan aıtty, dep habarlaıdy QazAqparat tilshisi.

«2016 jyldyń qyrkúıeginde Qyrǵyzstannyń Sholpan ata qalasynda Túrki keńesiniń 6-shy sammıti ótken bolatyn. Sol jıynda 4-shi Dúnıejúzilik kóshpendiler oıynyn Túrkııada ótkizý týraly sheshim qabyldaǵan edik. Eger sizder ruqsat etseńizder, bul oıyndardy myna koronavırýs pandemııasyna baılanysty keıinge qaldyryp, 2022 jyly ótkizbek oıymyzda bar», - dedi Túrkııa Prezıdenti.

Sonymen qatar Rejep Taııp Erdoǵan Túrki keńesine múshe elderdiń basshylaryn Antalııa dıplomatııalyq forýmyna, TMYK-tyń 8-shi sammıtine shaqyrdy.

«Antalııa dıplomatııalyq forýmy maýsym aıynyń ishinde ótedi. Forým túrli salada pikir almasý alańy retinde jumys isteıdi. Sonymen qatar Túrki keńesiniń 8-shi sammıtin 2021 jyldyń 12 qarashasynda Ystanbulda ótkizemiz dep úmittenemin», - dedi Túrkııa basshysy.

Osy rette Qazaqstan Prezıdenti Qasym-Jomart Toqaev túrki álemniń bolashaǵyna qatysty ózekti máselelerdi kóterip, salmaqty pikir aıtqan Túrkııa Prezıdentine rızashylyǵyn bildirdi.

«Sizdiń elińiz túrki dúnıesin jańǵyrtýǵa jáne ony zaman talabyna saı jańǵyrtýǵa orasan zor úles qosyp kele jatqany belgili. Qazaqstan Sizdiń bastamalaryńyzdy qoldaıdy», - dedi Memleket basshysy.