Rejep Taııp Erdoǵan Túrki áleminiń eń joǵarǵy ordenimen marapattalady - TMU sammıti
Qasym-Jomart Toqaev qazir uıym hatshylyǵyna júkteletin jaýapkershilik artqanyn atap ótti. Sondyqtan ol Túrki keńesin qurý jónindegi Nahchyvan kelisiminiń 13-shi babyndaǵy Turaqty ókilder týraly máseleni qarastyrýdy usyndy. Olar ózara is-qımyldy úılestirý isinde mańyzdy ról atqarar edi.
«Túrki jurtynyń túrli saladaǵy baılanysyn bekemdeıtin birneshe qurylym bar (ıaǵnı, Uıym Hatshylyǵy, TúrkPA, Túrksoı, Túrki akademııasy, Túrki mádenıeti jáne murasy qory). Biraq, keı jaǵdaıda olardyń mindetteri qaıtalanyp jatady. Bul uıymdardy tıimdi paıdalaný úshin VII Sammıtte qurylǵan Úılestirý komıtetiniń qyzmetin jandandyrý qajet. Komıtet bul qurylymdardyń jumysyn durys úılestire bilse, olar birin-biri tolyqtyra túser edi», - dedi Memleket basshysy.
Ol túrki elderiniń birligi jyl ótken saıyn nyǵaıyp kele jatqanyn alǵa tartty. Sonyń arqasynda túrki áleminiń halyqaralyq arenadaǵy saıası salmaǵy edáýir artqan.
»Túrkııa Respýblıkasynyń Prezıdenti, Joǵary mártebeli Rejep Taııp Erdoǵan bir jyl boıy Túrki memleketteri uıymynyń tóraǵasy mindetin atqardy. Osy ýaqyt ishinde uıymnyń mártebesin kóterip, yqpalyn nyǵaıtýǵa zor úles qosty. Sol úshin baýyrym – Rejep myrzaǵa alǵys aıtamyn.
Respýblıka atanǵanyna kelesi jyly bir ǵasyr bolatyn baýyrlas Túrkııa eli ózara yntymaqtastyǵymyzdy nyǵaıtýǵa zor úles qosa beredi dep senemin. Osy oraıda, men qurmetti Rejep beıdi «Túrki áleminiń eń joǵarǵy ordenimen» marapattaý týraly bastama kóterdim. Bul usynysym biraýyzdan qoldaý tapty. Sol úshin barshańyzǵa rızashylyǵymdy bildiremin», - dedi Qasym-Jomart Toqaev.
Qazaqstan Prezıdenti sóziniń sońynda uıymǵa tóraǵalyq etý mindeti Ózbekstanǵa berilýine baılanysty ózbek baýyrlarymyzǵa taǵy da tolaǵaı tabys tiledi. Budan bólek, uıymnyń Bas hatshysy laýazymyn atqarý kezegi baýyrlas Qyrǵyzstan ókiline ótedi.
«Osy oraıda, 2018 jyldan beri Túrki memleketteri uıymynyń Bas hatshysy qyzmetin atqarǵan Baǵdat Ámireevke alǵys aıtamyn. Al jańadan taǵaıyndalǵan Bas hatshy Kýbanychbek Ómirálıevtiń jumysy jemisti bolýyna tilektestik bildiremin», - dedi Memleket basshysy.
Foto: 1news.az
