Rejep Taııp Erdoǵan Qazaqstanǵa memlekettik saparmen keledi
ASTANA. KAZINFORM – Túrkııa Prezıdenti Rejep Taııp Erdoǵan mamyr aıynda Qazaqstanǵa memlekettik saparmen keledi. Bul týraly Úkimet úıinde Túrkııa Vıtse-prezıdenti Jevdet Iylmazben Saýda-ekonomıkalyq yntymaqtastyq jónindegi komıssııanyń 14-otyrysyn ótkizip jatqan Premer-mınıstr Oljas Bektenov aıtty.
- Túrki dúnıesiniń altyn besigi - Uly dala keńistigi ortaq tarıh pen rýhanı qundylyqtardyń toǵysqan mekeni. Qazaqstanǵa jasalǵan ár sapar tek resmı kezdesý ǵana emes, tarıhı sabaqtastyqtyń jarqyn kórinisi. Sizderdi Astanada Saýda-ekonomıkalyq yntymaqtastyq jónindegi komıssııanyń 14-otyrysynda qarsy alǵanyma qýanyshtymyn, - dedi Úkimet basshysy.
Premer-mınıstr 2024 jyly Ankarada ótken Úkimetaralyq komıssııa otyrysy elderimizdiń qarym-qatynasyna eleýli úles qosqanyna nazar aýdartty.
- Ekonomıkanyń barlyq salasy boıynsha áleýetimiz zor. Búgingi bas qosýymyz bul múmkindikti qoldaný baǵytynda jańa belester ashatynyna senimdimin. Elderimizdiń baýyrlastyǵy jyldar boıy tabysty túrde damyp keledi. Biz Túrkııamen aradaǵy baılanystardy keńeıtilgen strategııalyq áriptestik rýhynda odan ary damytýǵa aıryqsha mán beremiz, - dedi ol.
Oljas Bektenov memleketterimizdiń kóshbasshylary arasynda ıgi dástúrge aınalǵan shynaıy dostyq ekijaqty qatynastardy tereńdetýge berik negiz qalaǵanyn basa aıtty.
- Bizdiń Prezıdentterimiz - qurmetti Qasym-Jomart Kemeluly Toqaev pen Rejep Taııp Erdoǵan ózara saparlar men halyqaralyq is-sharalar aıasynda únemi kezdesip turady. Bul rette Túrkııa Prezıdentiniń mamyr aıynda Qazaqstanǵa memlekettik saparmen kelýin erekshe kútýdemiz. Búgingi úkimetaralyq komıssııanyń otyrysy Túrik memleketi basshysynyń aldaǵy saparynyń mazmundyq bóligine súbeli úles qosyp, jańa bastamalardy aıqyndaýǵa yqpal etedi dep senemin, - dedi Premer-mınıstr.
Osyǵan deıin Túrkııa prezıdenti Erdoǵan Toqaevty cáýirde ótetin Dıplomatııalyq forýmǵa shaqyrǵan bolatyn.
