Rejep Erdoǵan: Órtengen ormandar qalpyna keltiriledi

ANKARA. QazAqparat – Túrkııa eldiń ońtústik-shyǵysynda orman órtiniń saldaryn eń qysqa merzimde joıyp, apattan zardap shekken aýdandardy qalpyna keltirmek. Bul týraly Túrkııa prezıdenti Rejep Taııp Erdoǵan CNN Turk jáne Kanal D telearnalaryna bergen suhbatynda málim etti, dep habarlaıdy QazAqparat Anadoly agenttigine silteme jasap.

«Órtengen ormandar qalpyna keltiriledi. Biz bul aýmaqqa jańa aǵashtar otyrǵyzamyz, munda qaıtadan ormandar paıda bolady», - dep málimdedi túrik kóshbasshysy.

Onyń aıtýynsha, tabıǵı apattan zardap shekken aýmaqtarda qurylys jumystary bir aıdan keıin bastalady. Memleket basshysy olardy bir jyldyń ishinde aıaqtaý josparlanyp otyrǵanyn qosyp ótti.

Prezıdent Erdoǵan sondaı-aq, Túrkııa sońǵy bes jylda orman aktıvteriniń aýmaǵyn kótergen elder reıtınginde 46-shy orynnan 27-ge joǵarylaǵanyn atap ótti.

Túrkııanyń koronavırýsqa qarsy kúres júrgizý sharalaryna toqtalǵan prezıdent, el bıligi barlyq turǵynǵa vaktsına saldyrtýdy kózdep otyrǵanyn málimdedi. Erdoǵan bul maqsatqa jetý úshin qajetti resýrstar túgel jumyldyrylǵanyn aıtty.

Túrkııa prezıdenti koronavırýsqa qarsy TURKOVAC vaktsınasy shyǵarylatynyn málim etti. «Búgingi kúnge deıin jaqsy nátıjelerge qol jetkizildi. Jyl sońyna deıin jaqsy jańalyq estýge úmittimiz», - dedi ol.

Túrkııa prezıdenti sondaı-aq, «Talıban» qozǵalysy jasaqtarynyń basyp alý jaǵdaılaryna baılanysty Aýǵanstandaǵy ahýaldy sóz etti. Onyń aıtýynsha, ol bul eldegi jaǵdaıdy Katar bıligimen talqylady. «Búgin keshke Katar bıligimen kelissózder júrgizdim, biz Talıban jasaǵan qadamdardy qalaı toqtata alatynymyzdy, beıbit jolǵa qadamdy qaı jerde jasaı alatynymyzdy talqyladyq», - dedi prezıdent Erdoǵan.