Rejep Erdoǵan BUU-nyń 81-sessııasynda Túrki memleketteri uıymynyń mańyzyn atap ótti
ASTANA. KAZINFORM - Túrkııa Prezıdenti Rejep Taııp Erdoǵan Nıý-Iorkte ótken BUU Bas assambleıasynyń 81-sessııasynyń jalpy pikirtalas barysynda sóılegen sózinde Túrki memleketteri uıymynyń (TMU) jylda-jylǵa nyǵaıyp, óńirlik yntymaqtastyqtyń úlgili modeline aınalyp kele jatqanyn málimdedi.
-Túrki memleketteri uıymynyń jyldan-jylǵa nyǵaıyp, óńirlik yntymaqtastyqtyń úlgili modeline aınalyp kele jatqanyna qýanyshtymyz, – dedi Rejep Taııp Erdoǵan.
Ol sondaı-aq 30 qazanda Ankarada ótetin Túrki memleketteri uıymynyń 13-sammıtine nazar aýdardy. Túrkııa Prezıdentiniń aıtýynsha, aldaǵy joǵary deńgeıdegi kezdesý uıym aldynda jańa múmkindikter ashyp, yntymaqtastyqtyń jańa baǵyttaryn aıqyndaýǵa yqpal etedi.
Túrkııa Prezıdentiniń BUU minberinen Túrki memleketteri uıymyna arnaıy toqtalýy túrki álemindegi yntymaqtastyqtyń halyqaralyq kún tártibindegi orny artyp kele jatqanyn kórsetti. Al TMU-nyń aldaǵy resmı sammıti uıymǵa múshe elder arasyndaǵy yqpaldastyqtyń aldaǵy baǵyttaryn talqylaıtyn mańyzdy alań bolmaq.
Sondaı-aq Rejep Taııp Erdoǵan BUU Bas ssambleıasynda sóılegen sózinde qazirgi halyqaralyq qatynastar júıesine de toqtalyp, jahandyq máselelerdi sheshýde kópjaqty yntymaqtastyq pen dıplomatııanyń rólin kúsheıtý qajettigin atap ótti.
Túrkııa Prezıdenti BUU Qaýipsizdik Keńesin reformalaý qajettigi jónindegi ustanymyn taǵy da bildirdi.
Aıtýynsha, daǵdarys pen qaqtyǵys jaılaǵan elderdegi halyqtyń BUU-nyń beıbitshilik ornatý múmkindigine degen senimi birtindep álsirep bara jatyr. Sonymen qatar ol halyqaralyq júıege degen senimdi qaıta qalpyna keltirý qajettigin aıtyp, BUU Bas hatshysynyń reformalarǵa baǵyttalǵan bastamalaryn, sonyń ishinde «BUU-80» bastamasyn qoldaıtynyn bildirdi. Túrkııa Prezıdenti Qaýipsizdik Keńesin reformalaý jónindegi ustanymyn taǵy da qaıtalap, 193 memlekettiń erik-jigeri Keńestiń bes turaqty múshesiniń sheshimine táýeldi bolatyn júıe halyqaralyq qoǵamdastyqtyń tolyq senimine ıe bola almaıtynyn málimdedi. Osy oraıda ol buǵan deıin birneshe ret atap ótken «Álem bes elden úlken» qaǵıdatyn taǵy da eske saldy.
Osyǵan deıin Erdoǵan Túrkııanń túrki memleketterimen qorǵanys ónerkásibi salasyndaǵy tájirıbesimen bólisýge daıyn ekenin málim etken bolatyn.
