Rezervke engen pedagogter mektep dırektory qyzmetine qalaı taǵaıyndalady
ASTANA. KAZINFORM — Oqý-aǵartý mınıstrligi mektep dırektorlaryn taǵaıyndaý protsesine qatysty túsinik berdi.
— Memleket basshysy Qasym-Jomart Toqaevtyń 2023 jylǵy 29 naýryzda VIII saılanǵan Qazaqstan Respýblıkasy Parlamentiniń birinshi sessııasynyń ashylýynda menedjmentti jaqsartý maqsatynda bergen tapsyrmasyna sáıkes, mınıstrlik 2023 jyldan bastap «Bilim berýdegi ózgeristerdiń 1000 kósbasshysy» jobasyn iske asyryp keledi. 2023 jyly 207 pedagog Respýblıkalyq kadr rezervine enip, olardyń 181-i (aýyl mektepterine — 41%, qala mektepterine — 59%) orta bilim berý uıymdaryna konkýrssyz basshy laýazymyna taǵaıyndaldy. Sonymen qatar, birinshi basshylardy bilim berý uıymdaryna jumysqa qabyldaý Bilim jáne ǵylym mınıstriniń 2012 jylǵy 21 aqpandaǵy № 57 buıryǵymen bekitilgen Memlekettik bilim berý uıymdarynyń birinshi basshylary men pedagogterin laýazymǵa taǵaıyndaý, laýazymnan bosatý qaǵıdalaryna sáıkes júzege asyrylady, — delingen mınıstrliktiń Kazinform agenttigine bergen jaýabynda.
Qaǵıdalardyń 126-tarmaǵyna sáıkes, Kadr rezervine alynǵan pedagog bilim basqarmalarynyń qaraýy boıynsha shalǵaıdaǵy aýyldyq jerde ornalasqan memlekettik bilim berý uıymynyń, shaǵyn jınaqty mekteptiń basshysy laýazymyna olardyń kelisimi aıasynda konkýrstyq rásimderden ótpeı, jumys berýshiniń sheshimine sáıkes taǵaıyndalý normasy engizildi.
— 2024 jyly 376 rezervshi daıyndaldy, onyń ishinde mektepke deıingi uıymdarǵa -11, orta bilim berýge — 316, tehnıkalyq jáne kásiptik bilim berýge — 49. Qazirgi kezde 127 (34%) rezervshi konkýrssyz negizde laýazymdarǵa taǵaıyndaldy: 95-i basshy, 32-i basshynyń orynbasary. Sonymen qatar, pedagogterdi attestattaýdan ótkizý qaǵıdalary men sharttaryna sáıkes, Respýblıkalyq kadr rezervshileri bilim berý uıymynyń basshysy nemese basshynyń orynbasary laýazymyna taǵaıyndalǵan kezde, birinshi sanattaǵy basshy nemese birinshi sanattaǵy basshynyń orynbasary biliktilik sanaty attestaýdan ótpeı beriledi. Osy rette bilim berý uıymdaryna basshylardy taǵaıyndaý jańa formatqa kóship otyr, arnaıy oqýdan ótken bilikti orynbasarlar respýblıkalyq kadr rezervke engizilip, tikeleı taǵaıyndalyp otyr. Bul mekteptegi oqý-tárbıe protsesin arttyrady. Ol óz kezeginde bilim sapasynyń kóterilýine ákeledi, — dep atalyp ótken vedomstvo aqparatynda.
Eske salsaq, bıyl aqpan aıynda Oqý-aǵartý mınıstri Ǵanı Beısembaev vedomstvonyń alqa májilisinde mektep dırektorlarynyń deńgeıi oıdaǵydaı bolmaı turǵanyn aıtty.