Rezervattan zańsyz ań aýlaǵandarǵa qandaı jaza qoldanylady

PAVLODAR. KAZINFORM — «Ertis ormany» tabıǵı rezervaty aýmaǵynda ańnyń kez kelgen túrin atýǵa tyıym salynǵan. Ańshylar keıbir sırek jáne baǵaly ańdardy aýlaǵany úshin qandaı jaza qarastyrylǵanyn bile júrgeni abzal. 

2026 jyly belgilengen aılyq eseptik kórsetkish (1 AEK = 4 325 tg) negizinde, zańsyz aýlanǵan árbir ań úshin memleketke keltirilgen zalaldy óteý mindetteledi. Al rezervat aýmaǵynda bul somalar eselenip esepteledi.

«Ertis ormany» rezervatynda ańshylyqqa tyıym salynǵan. Muny bilmeı, myltyq kezeseńiz, iri kólemdegi aıyppuldar men qylmystyq jaýapkershilik kútip tur.

Tuıaqtylar men terisi baǵaly ańdar:

— Bulan — 2 162 500 teńge (500 AEK) — eń iri aıyppuldyń biri;
— Elik — 1 081 250 teńge (250 AEK);
— Orman sýsary: 865 000 teńge (200 AEK);
— Sileýsin: 86 500 teńge (20 AEK);
— Borsyq: 43 250 teńge (10 AEK);
— Túlki, qoıan, qarsaq, tıin: 21 625 teńge (5 AEK).

Qazaqstannyń Qyzyl kitabyna engen qustar men ańdardy aýlaý — erekshe aýyr qylmys. Olardyń popýlıatsııasynyń azaıýy ekojúıeniń tepe-teńdigin buzady. Máselen:

Itelgi: 3 027 500 teńge (700 AEK);
Búrkit jáne suńqyldaq aqqý: 1 730 000 teńge (400 AEK).
Tek janýardyń ózin ǵana emes, onyń ósip-óný ortasyn buzý da zańmen jazalanady. Máselen, qus uıasyn nemese ań inin buzǵany úshin 43 250 teńge (10 AEK) aıyppul salynsa, jumyrtqalardy zańsyz alýdyń jazasy eresek janýar qunynyń 50%-yn quraıdy.

Janýarlardy izdeý, ańdý jáne qýdalaý, sondaı-aq ańshylyq alqaptarynda qarý-jaraq nemese ań aýlaıtyn qustarmen júrý ańshylyqqa teńestiriletinin bilý mańyzdy. Bul áreketter úshin de aıyppul salynyp, qylmystyq jaýapkershilik júkteledi.

Buǵan deıin Pavlodar óńirinde qysta qandaı ańdardy aýlaýǵa bolatynyn jazǵanbyz.