«Rezeńke páterler»: zańger páterge qansha adamdy tirkeýge bolatynyn túsindirdi
ASTANA. KAZINFORM – Bir páterde qansha adam tirkelýi múmkin? 10, 20, tipti 100 adam degenniń ózi kóp kórinedi. Alaıda elordada byltyr bir páterge 3 450 adamnyń tirkelgen jaǵdaıy anyqtalǵan. Turǵyndardy tirkeý tártibin zańger Arys Danaǵatov Jibek Joly telearnasyndaǵy «Búgin.LIVE» baǵdarlamasynda túsindirdi.
– Osy kezge deıin zańda naqty shekteý bolmaǵan. Sondyqtan keıbir adamdar kóp adamdy bir páterge tirkeı bergen. Bireýler muny bıznes retinde paıdalanǵan. Mysaly azamat basqa aýdanda turady, biraq jaqsy mektep nemese aýrýhanaǵa jaqyn bolý úshin sol aýdanǵa tirkelýge tyrysady. Sol sebepti adamdar ortalyqqa jaqyn osyndaı páterlerge tirkelýge umtylady, – dedi ol.
Zańgerdiń aıtýynsha, páterdegi tirkeý sany onyń alańyna baılanysty esepteledi.
– Qazirgi shekteý boıynsha bir adamǵa 15 sharshy metr esepteledi. Mysaly, páterdiń kólemi 60 sharshy metr bolsa, ony 15-ke bólemiz. Sonda tórt adamdy tirkeýge bolady. Al odan kóp adamdy tirkeýge bolmaıdy. Biraq bul shekteý jaqyn týystarǵa, ıaǵnı balalaryńyzǵa, ata-ájelerińizge qatysty qoldanylmaıdy, – dep túsindirdi maman.
Al páter jaldap turatyn azamattardyń jaǵdaıynda zańger turǵyn men úı ıesi arasynda jaldaý sharty jasalýy kerek ekenin atap ótti.
– Zań boıynsha páterdi jalǵa alsańyz, jaldaý týraly shart jasaısyz. Eger shart 12 aıdan uzaq bolsa, ony HQO-da tirkeý kerek. Biraq kóbinese páter ıeleri salyq tólegisi kelmegendikten, shart jasamaıdy. Aqshany qolma-qol alady. Bul jerde de zań bar, biraq adamdardyń sol zańǵa sáıkes jumys isteýi ózderine baılanysty, – dedi Arys Danaǵatov.
Maman páterge zańsyz adamdardy tirkeýdiń jaýapkershiligi de bar ekenin aıtty. Onyń aıtýynsha, mundaı jaǵdaıda ákimshilik jaýapkershilik qarastyrylǵan. Zańsyz tirkeý aýqymdy sıpat alǵan jaǵdaıda ózge de jaýapkershilik túrleri qoldanylýy múmkin.
Al burynnan normadan artyq adam tirkelgen páterlerdegi azamattardyń avtomatty túrde tirkeýden shyǵarylatyny nemese shyǵarylmaıtyny ázirge naqty belgisiz. Zańgerdiń aıtýynsha, bul másele boıynsha tıisti organdardyń tekserýi júrgizilip jatyr.
Jańa talaptardyń páter jaldaý naryǵyna áseri de turǵyndardy alańdatyp otyr. Alaıda zańger bul ózgeris baspana naryǵyna aıtarlyqtaı yqpal etpeıdi dep esepteıdi.
– Meniń oıymsha, bul páterdi alý-satýǵa áser etpeıdi. Biraq qazir shetelden keletin mıgranttar aǵyny kóbeıdi. Olarǵa páter boıynsha tirkelý mańyzdy. Sondyqtan osyndaı kezde másele týyndaýy múmkin, – dedi zańger.
Aıta keteıik, buǵan deıin, jalǵa alýshynyń ruqsatynsyz páterge kiretin páter ıeleri jaıly jazǵan edik.
