Reıtıngtik týrnırde qazaqstandyq balýandar tórt medal aldy

ASTANA. QazAqparat - Qyrǵyzstan astanasy Bishkekte ótip jatqan kúresten reıtıngtik týrnırdiń 3-kúninde ulttyq qurama 2 altyn, 1 kúmis pen 1 qola medal jeńip aldy, dep habarlaıdy QazAqparat tilshisi.

Reıtıngtik týrnır Qojamqul Qabauly men Ratbek Sanatbaevtyń qurmetine arnaldy.

Jarys barysynda áıelder kúresinen Marına Sedneva (55 keli) men Jámıla Baqbergenova (72 keli) jeńis tuǵyryna kóterildi. Al Irına Kazıýlına (65 keli) kúmis medalǵa qol jetkizdi.

Erkin kúresten Nursultan Azov (97 keli) qola júlde ıelendi.

«Jylyna tórt reıtıngtik týrnır bekitilgen. Qazirge deıin mundaı jarystar Horvatııa men Egıpette ótkizilse, endi ol Qyrǵyzstanda jalǵasyp otyr. Tórtinshisi shilde aıynda Vengrııada jalaýyn kóteredi. Balýandar reıtıngtik týrnırlerde upaı jınaıdy. Nátıjesinde qyrkúıek aıynda Serbııada bolatyn álem chempıonatynda upaıdy kóp jınaǵan balýandar jartylaı fınal nemese fınalǵa deıin bir-birimen kezdespeıdi. Reıtıngtik týrnır aıaqtalǵannan keıin 10-18 maýsym aralyǵynda Bishkekte 17 jáne 23 jasqa deıingiler arasynda Azııa chempıonaty ótkiziledi», - dedi QR Kúres federatsııasy baspaóz qyzmetiniń jetekshisi Aspandııar Esenjolov.