Reıtıng agenttikteriniń baǵasy joǵary bilim berý sapasynyń basty kórsetkishi emes - aımaqtyq forýmǵa qatysýshylar
ALMATY. 24 qazan. QazAqparat - Qazaqstandaǵy 6 ýnıversıtet bıyl QS (Quacquarelly Symond) halyqaralyq reıtıng agenttiginiń baǵalaýyna endi. Bul búgin Almatyda ótip jatqan «Ortalyq Azııadaǵy joǵary bilim berýdiń damýy: sapany qamtamasyz etýdiń, aqparattyń jáne saralaýdyń mańyzy» dep atalatyn aımaqtyq forýmda aıtyldy.
«Qazaqstandyq ýnıversıtetterdiń ekeýi qazirdiń ózinde QS (Quacquarelly Symond) reıtıngi boıynsha álemniń eń ozyq 400 joǵary oqý ornynyń qataryna endi. Elbasy 2020 jylǵa 2 ýnıversıtettiń úzdik júzdiktiń qataryna enýdi mindettegen bolatyn. Al kórshiles Reseı oǵan 5 ýnıversıtetti engizýdi aldyna maqsat etip otyr», - deıdi ál-Farabı atyndaǵy Qazaq ulttyq ýnıversıtetiniń birinshi prorektory Muhambetqalı Búrkitbaev. Onyń aıtýynsha, reıtıng agenttikteri joǵary oqý oryndarynyń ǵylymı-zertteý baǵytyna aıryqsha mán beredi. Ýnıversıtetterdiń halyqaralyq reıtıng agenttikteriniń baǵalaýyna qatyspaýyna, eń aldymen ǵylymnyń ýnıversıtetterge tek sońǵy jyldary ǵana ene bastaýy túrtki bolyp otyr. Keńestik dáýirde akademııalyq, salalyq jáne joǵary oqý oryndarynyń satyly bilim berý júıesi qurylǵandyqtan ýnıversıtettegi ǵylymı quramdar aıtarlyqtaı tómen boldy. Ýnıversıtetterdiń bilimdi kapıtaldandyrý tájirıbesi bolmady. Olar ǵylymı nátıjelerdi kommertsııalandyrýmen aınalysqan joq. Oqý ornydarynda jańadan qurylyp jatqan tehnoparkter áli bastapqy kezeńde jáne keıbir ýnıversıtetterde ol tipti áli kúnge deıin qolǵa alynbaı otyr.
