Reıstiń keshiktirilýinen ash qalǵan qazaqstandyq avıakompanııany sotqa berdi

AQTÓBE. QazAqparat – Reıstiń keshiktirilgeni úshin jolaýshylardy tamaqtandyrmaǵan «Qazaq AIR» avıakompanııasy 600 myń teńgeden astam soma aıyppul tóleıtin boldy, dep habarlaıdy QazAqparat tilshisi.

«Aqtóbe-Astana» baǵytyndaǵy reıs 4 saǵat 40 mınıtqa keshigip, jolaýshy tasymaldaýshy kompanııany sotqa berdi.

Aqtóbe qalalyq ákimshilik quqyqbuzýshylyq jónindegi mamandandyrylǵan aýdanaralyq soty qala turǵynynyń shaǵymyn qarady.

Іs materıalyna súıensek, «Qazaq AIR» komanııasynyń áýe reısi 4 saǵat 40 mınýtqa keshikti. Kompanııa ókili «Aqtóbe-Astana» baǵytyndaǵy reıstiń keshigý sebebin ushaqtyń kesh kelýimen baılanystyrdy. Sot otyrysynda shaǵym túsirgen jolaýshy reıstiń keshiktirilýine baılanysty ózine tamaq pen sýsyn berilmegenin aıtty. QR «Áýe keńistigin paıdalaný jáne avıatsııa qyzmeti týraly» Zańyna sáıkes «Qazaq AIR» kompanııasy jolaýshyny tamaqtandyrýy tıis bolǵan.

Alaıda tasymaldaýshy kompanııa ókili shaǵymmen kelispedi. Sol kúni reıstiń keshikkeni týraly aldyn ala habarlama berilip, tamaq pen sýsyn taratylatyny týraly aıtylǵan. Al D.Januzaq saǵat 00.40-ta aýqattanǵysy kelgen. Ol kezde aktsıonerlik koǵammen kelisimshartqa otyrǵan dámhana jabyq bolǵan. Jolaýshyny tamaqtandyrý qıyndyǵy sodan týǵan. Sot otyrysy kezinde «Qazaq AIR» kompanııasynyń ókili isti toqtatýdy surady.

Sýdıa taraptardy tyńdaǵan soń, sheshimin shyǵardy.

Sot úkimine súıensek, «Qazaq AIR» kompanııasyna 612 myń 600 teńge ákimshilik aıyppul salyndy.