Reıster keshigip jatyr: Almaty áýejaıy jolaýshylarǵa júgindi

ALMATY. KAZІNFORM – Almaty halyqaralyq áýejaıy barlyq qyzmettiń kúsheıtilgen jumys rejımine kóshkenin  málimdedi. Reısterdiń keshigýin barynsha azaıtý úshin sharalar qabyldanyp jatyr.

Almaty halyqaralyq áýejaıynyń málimetinshe, meteorologııalyq jaǵdaıǵa baılanysty keıbir ushyp ketý reısteriniń ýaqyty keıinge shegerildi.

Keshigýlerdi azaıtý jáne jolaýshylarǵa jaıly jaǵdaı jasaý úshin áýejaı men áýe kompanııalary birlese jumys istep, kútý zaldarynda ystyq tamaq, jeńil taǵamdar jáne sýsyndar uıymdastyrdy.

– Ushý qaýipsizdigin qamtamasyz etý maqsatynda ushaqtarǵa muzǵa qarsy óńdeý jumystary Qazaqstannyń ulttyq zańnamasynyń talaptaryna, sondaı-aq FAA (AQSh Azamattyq avıatsııa federaldy basqarmasy) men Kanada Kólik mınıstrliginiń usynymdaryna sáıkes júrgizilip jatyr. Barlyq áýejaı qyzmeti kúsheıtilgen rejımde jumys istep jatyr. Áýejaıdyń nemese áýe kompanııalarynyń resmı paraqshalarynan reısterdiń aǵymdaǵy statýsyn aldyn ala tekserýlerin usynamyz, – dep habarlady Almaty halyqaralyq áýejaıynyń korporatıvtik kommýnıkatsııalar departamentinen.

Osyǵan deıin aýa raıyna baılanysty Almaty halyqaralyq áýejaıynda birqatar reıs keshigip jatqany týraly jazǵan edik.