Reısine mine almaǵan jolaýshy áýe kompanııasynan 500 myń teńge óndirip aldy

ALMATY. KAZINFORM — Almaty qalasynyń Túrksib aýdandyq sotynda azamat áýe kompanııasynan materıaldyq zalaldy óndirý jáne moraldyq zııandy óteý týraly azamattyq isi qaraldy. 

Sot málimetinshe, jolaýshy 2025 jyldyń 26 shildesinde Qyzylorda — Almaty baǵyty boıynsha reıske áýe bıletterin satyp alǵan. 16 tamyzda tirkeýden ótip, áýejaıǵa kelgennen keıin áýe kompanııasynyń qyzmetkerleri tirkeýdiń joıylǵanyn aıtyp, ony áýe kemesiniń bortyna jibermegen. Sondyqtan ol Almaty qalasyna josparlanǵan ýaqytta jete almaǵan.

Osyǵan baılanysty talap qoıýshy sottan jaýapkerden materıaldyq zalaldy, sondaı-aq moraldyq zııan ótemaqysyn óndirýdi suraǵan.

— Jaýapker jolaýshyny tasymaldaýdan bas tartýǵa zańdy negizderdiń bolǵanyn rastaıtyn dáleldemelerdi sotqa usynbaǵan. Sot sheshimimen talap ishinara qanaǵattandyrylyp, talap qoıýshynyń paıdasyna áýe kompanııasynan materıaldyq zalal, 500 000 teńge mólsherinde moraldyq zııan ótemaqysy, sondaı-aq sot shyǵyndary óndirildi, — dep habarlady sottan.

Sot sheshimi zańdy kúshine endi.

Eske salaıyq, buǵan deıin aqsha jymqyrý isi boıynsha Air Astana burynǵy qyzmetkerlerine sot úkimi shyqty.

Air Astana-nyń sottalǵan eks-qyzmetkerlerinen úı-jaı men baǵaly kólikter tárkilenetini belgili boldy.