Reıske keshikken ápkesi úshin ushaqta bomba bar dep jalǵan habar bergen jigit sottaldy

ASTANA. QazAqparat – Astana qalasynyń Esil aýdandyq №2 soty terrorızm aktisi týraly jalǵan habar bergen azamat N-di kináli dep taýyp, 2 jyl 6 aıǵa bas bostandyǵyn shektedi, dep habarlaıdy QazAqparat tilshisi.

Astana qalalyq sotynyń resmı saıtynda jarııalanǵan málimetke sensek, 1 qazanda azamat N. úıinde bolǵan.

Oǵan apaıy habarlasyp, Astana-Taldyqorǵan baǵytyndaǵy áýe reısine tirkeýge keshikkenin, sondyqtan ony ushaq bortyna kirgizbeı qoıǵanyn aıtqan.

Osydan keıin ol reısti bógeý maqsatynda atalǵan ushaq bortyna jarylǵysh zat qoıylǵany týraly jalǵan habar bergen.

Sot azamat N-di QR Qylmystyq kodeksiniń 273-baby boıynsha kináli dep tanydy jáne oǵan 2 jyl 6 aı merzimge bas bostandyǵyn shekteý túrindegi jaza taǵaıyndady.

Sonymen qatar ol jazasyn tolyq ótegenge deıin probatsııalyq baqylaýda bolady. Úkim zańdy kúshine engen joq.

Buǵan deıin elordada ushaqta jarylǵysh zat bar dep habarlasqan azamat ustalyp, ızolıatorǵa qamalǵanyn jazǵan edik.