Reısi toqtatylǵan áýe kompanııasy qyzmetkerlerine qol kótergen áıelge aıyppul salyndy

ASTANA. QazAqparat – 25 aqpanda Astana - Shymkent reısiniń toqtatylýyna baılanysty áýejaıda narazylyq bildirip, áýe kompanııasynyń qyzmetkerlerine qol kótergen elordalyq turǵyn ákimshilik jaýapkershilkke tartyldy, dep habarlaıdy QazAqparat tilshisi.

«Bul isti zertteý kezinde osy reıspen ushýy tıis bolǵan 27 jastaǵy elorda turǵyny anyqtaldy. Oǵan qatysty Ákimshilik quqyq buzýshylyq kodeksiniń 434-baby 1-bóligi «usaq buzaqylyq» jáne 73-2-baby «uryp-soǵý» boıynsha ákimshilik hattamalar toltyryldy. «Uryp-soǵý» baby boıynsha toltyrylǵan hattama sotqa joldanady, ol sotta qaralady», - dep málim etti Astana qalasynyń áýejaıyndaǵy jelilik polıtsııa bóliminen.

Eske salaıyq, 25 aqpan saǵat 5:40-qa josparlanǵan Astana - Shymkent KS-7307 áýe reısi kún raıynyń qolaısyzdyǵyna baılanysty keıinge qaldyrylyp, odan ári toqtatyldy. Azamattyq avıatsııa komıtetiniń dereginshe, keltirilgen qolaısyzdyqtar úshin zańnamaǵa saı jolaýshylarǵa salqyn sýsyndar men ystyq tamaq taratylǵan. Sondaı-aq, ótinish bildirgen barlyq jolaýshylardyń bılet quny qaıtaryldy.