Reısi keshikken jolaýshylarǵa qansha paıyz ótemaqy tólenedi
«Avıatsııa salasynda keshigý, reısterdiń oryndalmaý jaǵdaılary bolyp turady. Biraq osy keshikken ýaqytta jolaýshylardyń quqyǵy qalaı saqtalady? Máselen, QR Áýe keńistigin paıdalaný jáne avıatsııa týraly Zańynyń 86-babyna sáıkes, reıs keshikken kezde tasymaldaýshylar naqty qyzmet kórsetýi kerek. Eger sizdiń reısińiz 2 saǵattan artyq ýaqytqa keshikse, onda jolaýshylarǵa eki ret qońyraý soǵý múmkindigi beriledi. Onyń ishinde halyqaralyq qońyraýlar jáne elektrondy poshta arqyly habarlama joldaý múmkindigi bar. Odan keıin salqyndatylǵan sýsyndar beriledi. Eger sizdiń reısińiz 4 saǵatqa keshikken bolsa ystyq tamaq beriledi. Sonymen qatar, reıs kúndizgi ýaqytta 8 saǵatqa keshikse, ol jaǵdaıda jolaýshylar qonaq úılerge ornalastyrylady», - departament dırektory.
Onyń aıtýynsha, sońǵy eki aıda otandyq qos áýekompanııaǵa 7 000 AEK kóleminde (22 260 000 teńge) aıyppul salynǵan. Bul tasymaldaýshy kompanııalar reıster keshikken ýaqytta jolaýshylarǵa tıisti qyzmet kórsetpegen.
«Eki áýekompanııasy reıster keshikken kezde jolaýshylardy ystyq tamaq, sý jáne qonaq úımen qamtamasyz etpegen. Sondyqtan tekseris nátıjesinde osy máseleler anyqtalyp, aıyppul salyndy.
Aıta keteıin, árbir jolaýshy óziniń quqyǵy buzylǵany týraly Azamattyq avıatsııa komıteti men Qazaqstannyń avıatsııalyq ákimshiligine habarlasyp, shaǵym túsire alady. Jalpy reıs keshikken kezde árbir saǵat saıyn bılet qunynyń 3 paıyzy kóleminde ótemaqy tólenedi. Ol úshin áýekompanııalarǵa tikeleı aryz jazý kerek», - dedi Nurjan Malaev «Jańa ýaqyt» baǵdarlamasyna bergen suhbaty barysynda.
Eske salaıyq, buǵan deıin kóp synǵa ilkken Air Astana kompanııasynyń basshysy reısterdiń keshigýi nege jıilegenin túsindirgen bolatyn. Onyń dereginshe, áýejaılarda qyzmet kórsetetin qajetti resýrstar tapshy. Munymen qosa, ushaqtardyń qozǵaltqyshtaryna qajetti bólshekterdi elge jetkizý qıyndaǵan.
