Reıs keshikken jaǵdaıda jolaýshylarǵa qandaı qyzmetter usynylady
ASTANA. KAZINFORM — Air Astana reıs keshigýleri men jolaýshylar quqyqtary boıynsha aqparat usyndy. Aıtýlarynsha, reıs keshigip qalsa, jolaýshylar sýsyn, tamaqpen qamtylady. Sondaı-aq keı jaǵdaıda qonaqúıge ornalastyrylady.
Kompanııa málimetinshe, Air Astana toby áýe tasymaldaryn Qazaqstan Respýblıkasynyń zańnamasyna, áýekompanııalardyń jolaýshylardy tasymaldaıtyn qaǵıdalarǵa jáne tolyqtaı halyqaralyq normalarǵa sáıkes júzege asyrady.
— Reıs statýsy ózgergen jaǵdaıda, áýekompanııalar jolaýshylardy olardyń quqyqtary týraly resmı baılanys arnalary arqyly habardar etedi. Sonymen birge tasymal sharttary egjeı-tegjeıli kórsetilgen resmı saıttarǵa silteıdi. Reıs áýekompanııa kesirinen keshiktirilgen jaǵdaıda, jolaýshylarǵa zańnamada kórsetilgen merzimge saı sýsyndar men tamaq beriledi, qajet bolǵan jaǵdaıda qonaqúıge ornalastyrylady. Áýe kemesiniń túri ózgertilgende, ushý kestesin nemese ushatyn ýaqytty aýystyrý tasymaldaý qaǵıdalarynda kózdelgen jáne operatsııalyq qyzmettiń ajyramas bóligi bolyp sanalady. Jolaýshylarǵa ózgeris týraly barlyq aqparat aldyn ala jiberiledi, — delingen habarlamada.
2025 jyly áýekompanııalardyń ýaqytyly ushý kórsetkishi orta eseppen shamamen 80% boldy, bul — álem boıynsha ortasha deńgeı. Reısterdiń keshigýine kóbine kúnniń buzylýy, tehnıkalyq sebepter, áýejaılar men áýe keńistigindegi shekteýler, sondaı-aq ushaqtardyń kesh kelýine baılanysty týyndaıtyn rotatsııalyq kidirister áser etedi.
— Áýekompanııalar qyzmetinde qaýipsizdik asa mańyzdy. Osyǵan baılanysty barlyq talap qatań saqtalyp, keı jaǵdaıda ushaqtar ushqan áýejaıǵa keri qaıtarylýy da múmkin. Túıisken (tranzıttik) reısterge bılet satyp alǵan kezde áýekompanııalar bıletterdi bir blankide rásimdeýge keńes beredi. Mundaı jaǵdaıda tasymal qaǵıdalaryna sáıkes, jolaýshyny mejeli jerine jetkizý jaýapkershiligi tasymaldaýshyǵa júkteledi. Eger bıletter bólek blankilerde rásimdelse, tasymaldaýshy tek reıstiń keshikkenine qatysty ǵana zańnama aıasynda jaýapty bolady, — dep túsindirdi kompanııa.
Air Astana jáne FlyArystan Qazaqstan Respýblıkasynyń zańnamasy men Monreal konventsııasynyń talaptaryna sáıkes tirkelgen júk pen qol júgin tasymaldaýǵa jaýap beredi.
— Júk nemese qol júk joǵalsa, búlinse ne keshiktirilse áýekompanııanyń nemese onyń qyzmetkerleriniń kinásinen oryn alǵan jaǵdaıda, tasymaldaýshy ótemaqy tóleıdi. Jolaýshynyń jeke baqylaýyndaǵy qol júgi, tasymaldaýshynyń kinási dáleldenbegen bolsa, jolaýshynyń óz jaýapkershiliginde bolady. Qundy zattardy júkpen birge tasymaldaý qajet bolsa, olar aldyn ala deklaratsııalanyp, saqtandyrylýǵa tıis. Sol sebepti áýekompanııalar aqsha, zergerlik buıymdar jáne basqa da baǵaly zattardy tirkelgen júkke salmaýǵa keńes beredi. Air Astana toby aqshalaı qaıtarymdar men ótemaqy tólemderin Qazaqstan Respýblıkasynyń zańnamasy men tasymal shartyna sáıkes júzege asyrady. Bıletti alǵanda qandaı tásilmen tóleseńiz, aqysy sol tásilmen qaıtarylady. Nomad Club baǵdarlamasy aıasynda vaýcherler nemese bonýs baldaryn berý — áýekompanııanyń jolaýshyǵa qosymsha iltıpat retinde, erikti túrde jasalatyn usynysy. ıAǵnı mindetti ótemaqy túri emes. Reıs keshikse, qyzmet sapasy nemese ótemaqy máseleleri boıynsha Air Astana kompanııasyna habarlasý úshin jolaýshylar myna jerge júgine alady: help.airastana.com. FlyArystan áýekompanııasyna qatysty suraqtar boıynsha myna siltememen baılanysýge bolady: https://flyarystan.com/support, — dep túıindedi Air Astana baspasóz qyzmeti.
Budan buryn Astana áýejaıynda qolaısyz aýa raıyna baılanysty reıster keshigip jatqanyn jazǵan edik.