Reıs keshikken kezde tıisinshe qyzmet kórsetpegen avıakompanııalar jaýapqa tartyldy

NUR-SULTAN. QazAqparat - Azamattyq avıatsııa komıteti «Qazaqstannyń Avıatsııa ákimshiligi» AQ-men birlesip kóptegen reısterdiń keshigýine jáne jolaýshylardan túsken shaǵymdarǵa baılanysty tekserýlerdi jalǵastyryp jatyr, dep habarlaıdy QazAqparat.

«Tergeý barysynda bıylǵy 5 maýsymda «Eır Astana» kompanııalar tobyna kiretin Fly Arystan áýetasymaldaýshysynyń Almaty – Shymkent baǵyty boıynsha KS-7105 reısi 15 saǵat 10 mınýtqa keshikkeni anyqtaldy. Osy reıstiń jolaýshylaryna ushýdy kútý kezinde «QR áýe keńistigin paıdalaný jáne avıatsııa qyzmeti týraly» Zańnyń 86-babynyń 1-bóliginde kózdelgen qyzmetter, atap aıtqanda qonaq úıge ornalastyrý qyzmeti durys deńgeıde kórsetilmegen.

Osyǵan baılanysty, 28 shildede avıakompanııaǵa qatysty QR Ákimshilik quqyq buzýshylyq týraly kodeksi 567-babynyń 2-bóligimen hattama toltyrylyp, oǵan sáıkes avıakompanııaǵa 1 000 AEK (3 000 063 teńge) kóleminde aıyppul salyndy», - dep málimdeıdi Indýstrııa jáne ınfraqurylymdyq damý mınıstrliginiń baspasóz qyzmetinen.

Buǵan deıin «Eır Astana» kompanııalar toby aǵymdaǵy jyldyń 7 jáne 21 shildesinde reısti keshiktirý kezinde jolaýshylardyń quqyqtaryn buzǵany úshin 1 000 AEK (3 000 063 teńge) kóleminde aıyppul túrinde ákimshilik jaýapkershilikke tartyldy.

«Jalpy, bıyl «Eır Astana» kompanııalar toby reıstiń keshigýi kezinde jolaýshylardyń quqyqtaryn buzǵany úshin 9 189 000 teńge kóleminde ákimshilik jaýapkershilikke tartyldy», - dep tolyqtyrady vedomstvodan.

Qazirgi ýaqytta reıstiń keshigýine jáne jolaýshylar quqyqtarynyń buzylýyna baılanysty tergeý jalǵasyp jatyr. Quqyq buzýshylyq faktileri anyqtalǵan jaǵdaıda tasymaldaýshylar Qazaqstan Respýblıkasynyń qoldanystaǵy zańnamasyna sáıkes jaýapkershilikke tartylady.