Reıhstagqa shabýyl jasaǵan sarbazdardyń biri Túrkistan oblysynda turady
Túrkistan oblysynyń turǵyny Nemet Abdrasılov Ekinshi dúnıejúzilik soǵys kezinde Reıhstagqa shabýyl jasaǵan jaýyngerlerdiń arasynda bolǵan. Bul erligi men batyrlyǵy úshin ІІ dárejeli «Dańq» ordenimen marapattaldy.
Keıin jaýynger 1-gvardııalyq artıllerııalyq dıvızııa quramynda nysanashy, zeńbirek komandıri boldy. Stalıngrad, Kýrsk, Ýkraına, Belarýs, Polsha qalalaryn azat etýge qatysty. Janqııarlyq erlik kórsetken jaýynger «Qyzyl juldyz», І jáne ІІ dárejeli «Dańq», І dárejeli «Uly Otan soǵysy» ordenderimen, «Erligi úshin» jáne basqa da 24 medalmen marapattaldy.
«Mundaı soǵys endi qaıtalanbasyn. Álemge beıbitshilik tileımin. Qurmet kórsetip, merekede marapattap jatqan jandarǵa alǵysym sheksiz. Biz aýyr taǵdyrdy bastan ótkerdik. Búgingi urpaq baqytty ǵumyr keshsin», - dedi maıdanger.
Nemet Abdrasılov 1922 jyly 1 qańtarda Túrkistan qalasynda dúnıege kelgen. Soǵys aıaqtalǵan soń Túrkistan qalasy mılıtsııasynda jáne Túrkistan qalasynyń avtobazasynda júrgizýshi bolyp jumys istedi. Ardager 5 ul, 1 qyzdan, 20 nemere men 18 shóbere súıip otyr. Qazirgi tańda uly Elmýrat Abdrasılovpen birge turady.
Keshe Túrkistan oblysy ákiminiń orynbasary Beısen Tájibaev 101 jastaǵy ardager Nemet Abdrasılovtyń úıine arnaıy baryp, merekemen quttyqtaǵan bolatyn.
«Jas urpaq úshin sizdeı ardagerlerdiń erlikke toly ómirin nasıhattaý mańyzdy. Ekinshi dúnıejúzilik soǵysta bizdiń atalarymyz, apalarymyz Otan aldyndaǵy amanatqa adal boldy. Berlın tórinde Jeńis týyn tikti. Osy jeńimpaz toptyń qatarynda siz de barsyz. Biz eli qorǵaǵan maıdangerlerge árqashan qurmetpen qaraımyz», - degen Beısenbaı Tájibaev ardagerge syı-sııapatyn tapsyrdy.
