Reıderlikpen kásipti tartyp alýshylar týraly: Múgedek etemin dep qorqytady
AQTÓBE. QazAqparat - Aqtóbede munaı urlyǵy, uıymdasqan qylmystyq top qurdy, reıderlikpen kásipti tartyp aldy dep aıyptalyp jatqan topqa qatysty jańa derekter anyqtaldy. Jábirlenýshi Bolatbek Dosqojaev ózin qorqytyp, «aıaǵyńnan atamyn» degen aıyptalýshylardy atady, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda reıderlik jolmen tartyp alý epızody boıynsha birneshe kýáger tyńdaldy. Buǵan deıin habarlaǵanymyzdaı, «Tazadalakom» JShS qurýshy Oral Bısembın arada 4 jyl ótkende kompanııasynan aıyrylyp qalǵan bolatyn. Ol munyń bári sottalýshy Nurlan Noǵaevtyń isi dep otyr.
Al aıyptalýshy Nurlan Noǵaev buryn quqyq qorǵaý salasynda, «SNPS-Aqtóbemunaıgaz» AQ zańger bolyp jumys istegen. Keıin «Tazadalakom» JShS-de dırektordyń orynbasary qyzmetin atqardy. Sot otyrysy kezinde kompanııada jumys istegen jábirlenýshi Bolatbek Dosqojaev ózin aıyptalýshy Murat Turjanov pen Nurlan Noǵaev qorqytqanyn málimdedi.
«Olar meni qorqytty. Aıaǵymnan atyp, múgedek etemin dedi. Taǵy da qorqytqandaryn rastaımyn. Áli kúnge deıin qorqynysh bar»,- dedi jábirlenýshi B.Dosqojaev.
Sot otyrysy kezinde jábirlenýshi Oral Bısembın men Bolatbek Dosqojaev aıyptalýshylarǵa eshqandaı talap qoımaıtynyn jetkizdi. Olar materıaldyq, moraldyq ótemaqy suraǵan joq.
Al aıyptalýshy Murat Turjanov bárin joqqa shyǵaryp, jábirlenýshi Bolatbek Dosqojaevtyń «Tazadalakom» JShS-nan 10 paıyzdyq úles suraǵanyn jetkizdi.
