Reıderlik zańbuzýshylyqtar aýyr qylmys sanatyna jatqyzyldy
Eki kún buryn Prezıdent Qasym-Jomart Toqaev «Qazaqstan Respýblıkasynyń reıderlikke qarsy kúresti kúsheıtý, kásipkerlik qyzmetti memlekettik organdar men laýazymdy tulǵalardyń zańsyz aralasýynan qorǵaý jáne baǵaly metaldardyń zańsyz aınalymyna kedergi keltiretin sharalardy kúsheıtý máseleleri boıynsha keıbir zańnamalyq aktilerine ózgerister men tolyqtyrýlar engizý týraly» Zańǵa qol qoıǵan bolatyn.
Zańnadamaǵy jańa ózgerister men túzetýlerdi Qarjylyq monıtorıng agenttigi men basqa da memlekettik organdar «Atameken» ulttyq kásipkerler palatasymen birlesip, pysyqtaǵan.
Mundaǵy jańashyldyqtyń biri kásipkerlerdi qylmystyq jaýapkershilikke tartý bóliginde zańnamany izgilendirýmen baılanysty.
«Buryn iri zalal keltirilgen jaǵdaıda salyqtardy nemese basqa da mindetti tólemderdi tólemegeni úshin kásipker qylmystyq jaýapkershilikke tartylsa, qazir tólenbegen salyqtardyń somasy kúntizbelik jyl ishinde salyq tóleýshiniń eseptelgen barlyq salyqtary men bıýdjetke tólenetin basqa da mindetti tólemderi somasynyń 10%-ynan aspasa, jaýapkershilikke tartylmaıdy», - deıdi Qarjylyq monıtorıng agenttik mamandary.
Jańa qujatta reıderlik basyp alýǵa baǵyttalǵan korporatıvtik basyp alý tásilderi boıynsha naqtylaýlar qosylǵan jáne oǵan qarsy qoldanylatyn sanktsııalar kúsheıtilgen.
Mysaly, quqyq qorǵaý, baqylaýshy nemese sot organdary ókilderini tarapynan «syrtqy, kúshtik» reıderlik jasalsa, «aýyr qylmys» retinde qaralady.
Sondaı-aq, kásipkerlik qyzmetke kedergi keltirý bóliginde de qylmystyq is qozǵaýǵa jatatyn áreketterdiń túrleri naqty normalarmen tolyqtyryldy. Bap «aýyrlyǵy az» qylmystar sanatynan «ortasha aýyrlyqtaǵy» qylmystarǵa aýystyryldy.
«Bul túzetýler biryńǵaı quqyq qoldaný tájirıbesin qalyptastyrýǵa, reıderlikke neǵurlym tıimdi qarsy is-qımyl jasaýǵa múmkindik beredi jáne quqyq qorǵaý organdary tarapynan bızneske negizsiz aralasý úshin jaýapkershilikti kúsheıtpek», - dep jazylǵan qarjylyq monıtorıng agenttiginiń málimetinde.