Reıderlik qylmys: Almaty oblysy polıtsııa bastyǵynyń orynbasarynan jaýap alyndy

QONAEV.QazAqparat - Almaty oblysynyń polıtsııa departament bastyǵynyń orynbasary Rýstam Abdrahmanovtan atyshýly qylmystyq iske qatysty jaýap alyndy. Muny polıtsııa departamenti rastady, dep habarlaıdy QazAqparat tilshisi.

Buǵan deıin áleýmettik jelide Rýstam Abdrahmanovtyń jumys orny men úıine tintý júrgizildi delingen aqparattar taraǵan bolatyn.

«Qylmystyq is basqa quqyq qorǵaý organynyń is júrgizýinde. Osy is aıasynda R. Abdrahmanovtan kýáger retinde jaýap alyndy. Ol qyzmetinen shettetilgen joq»,- delingen Almaty oblysy polıtsııa departamenti baspasóz qyzmetiniń habarlamasynda.

Aıta keteıik, buǵan deıin Qarjylyq monıtorıng agenttigi reıderlik jasady dep aıyptalǵan kúdikti Eldos Qospaev pen onyń senimdi seriktesterine qatysty tergeý bastaǵanyn habarlaǵan bolatynbyz. Olar uıymdasqan qylmystyq top qurdy jáne oǵan qatysty degen kúdikke ilinip otyr.