Reıd: Kókshetaýda 88 nysan karantın rejımin buzǵan
KÓKShETAÝ. QazAqparat – Kókshetaý 6 mobıldik top oblys ortalyǵynda karantındik sharalardy saqtaý boıynsha reıd ótkizdi, dep habarlaıdy QazAqparat tilshisi.
Mobıldik topqa qalalyq ákimdigi, qalalyq taýarlar jáne kórsetiletin qyzmetterdiń sapasy men qaýipsizdigin baqylaý basqarmasy, qalalyq PB jáne «Atameken» ulttyq kásipkerler palatasynyń jergilikti fılıaly qyzmetkerleri kirgen.
Kókshetaý qalalyq taýarlar jáne kórsetiletin qyzmetterdiń sapasy men qaýipsizdigin baqylaý basqarmasy basshysy Qanat Ysqaqovtyń aıtýynsha, 8-9 maýsymda ótkizilgen reıd kezinde monıtorıngtik top qoǵamdyq tamaqtaný, qyzmet kórsetý, mádenıet, týrızm nysandary, sondaı-aq, azyq-túlik jáne azyq-túlik emes taýarlardy satatyn dúkender, qoǵamdyq kólikterde jumys algorıtmin túsindirdi.
«Aktsııa kezinde 802 qaýly men jumys algorıtmi tapsyryldy. Jalpy shara barysynda 88 nysanda zańbuzýshylyqtar oryn aldy. Onyń 57-i azyq-túlik jáne azyq-túlik emes taýarlardy satatyn dúkenderdiń úlesinde.
Atap aıtqanda, áleýmettik araqashyqtyqtyń saqtalmaýy, kóterme jáne bólshek saýda oryndarynda dúkenshiler men tutynýshylardyń maska taqpaýy, sanıtaızer men dezbarerlerdiń joqtyǵy, qoǵamdyq tamaqtaný oryndarynda otbasylyq merekelik sharalary ótkizý, as berý, keste boıynsha tazalaý, qyzmetkerlerge termometrııa júrgizý sııaqty karantındik talaptardyń oryndalmaǵany anyqtaldy», - deıdi Qanat Ysqaqov.
Vedomstvodan atap ótkendeı, 9 maýsymda júrgizilgen reıd kezinde de birqatar zańbuzýshylyqtarǵa jol berilgeni anyqtaldy. Máselen, «Bedduin», «Caffein» kofehanasynda, «Pınta» grıl barynda personaldarǵa medıtsınalyq baqylaý júgizilmegen, kúnine 3 ret termometrmen tekserip, jaǵdaılaryn surap, qaǵazǵa jáne elektrondy tirkemegen, júrgizilmegen, qyzmetkerler maskasyz júrgen, bolǵannyń ózinde ony durys taqpaǵan. Dızenfektsııa quraly jetkiliksiz kólemde, bólmege tazalyq tıim ári keste boıynsha júrgizilmegen.
«Anyqtalǵan barlyq zańbuzýshylyqtar boıynsha kásipkerlerge QR ÁQbK 462-babynyń 3- bóligi boıynsha ákimshilik hattama toltyryldy. Ákimshilik shara qoldaný úshin is materıaldary Kókshetaý qalalyq mamandandyrylǵan ákimshilik sotyna joldanatyn bolady. Bul baǵytta jumystar odan ári jalǵasa beredi», - dep tolyqtyrdy Qanat Ysqaqov.
