Reıd: Elordada karantın talaptaryn saqtamaı kelgen birqatar nysan anyqtaldy
NUR-SULTAN. QazAqparat – Elordanyń tártip saqshylary men ákimdik ókilderi elordadaǵy oıyn-saýyq mekemelerine saǵat keshki 20:00-den keıin birlesken reıd júrgizdi. Bul týraly QazAqparat Nur-Sultan qalasynyń polıtsııa departamentine silteme jasap habarlaıdy.
Tekseris qatań karantın sharalarynyń engizilgenine qaramastan, keıbir mekeme ıeleriniń Bas sanıtarlyq dárigerdiń Qaýlysynyń talaptaryna mán bermeı, jumysty jalǵastyryp júrgenin anyqtady.
Mysaly, Saýran kóshesinde ornalasqan dámhanany tekserý kezinde birqatar zańbuzýshylyqtar anyqtaldy. Bul jerge kelýshiler kalıan shegip otyrǵan. Ol úshin dámhana ákimshisi, sondaı-aq úsh kelýshi QR Ákimshilik quqyqbuzýshylyqtar týraly kodekstiń 441-baby (Qoǵamdyq oryndarda temeki buıymdary jáne elektrondy temeki shegý tyıymyn buzý) boıynsha ákimshilik jaýapqa tartyldy.
Qalanyń Qabanbaı batyr kóshesinde ornalasqan kompıýter klýby da salǵan tyıymdy elemeı, qyzmetin jalǵastyrǵan. Oǵan qosa, munda kelýshiler maska rejımin saqtamaǵany anyqtaldy.
Karantındi buzýdyń barlyq faktileri boıynsha materıaldar Taýarlar men kórsetilgen qyzmetterdiń sapasy men qaýipsizdigin baqylaý departamentine jiberildi.
