Reıd: Almatyda nómirsiz júrgen 70-ten astam júrgizýshi jazalandy
ALMATY. KAZINFORM - Almatyda «Qaýipsiz jol» respýblıkalyq jedel-aldyn alý is-sharasy júrip jatyr.
Onyń nátıjesinde 70-ten astam júrgizýshi memlekettik tirkeý nómirinsiz kólik basqarǵany úshin jazalandy. Olardyń jartysynan kóbi - moped júrgizýshileri.
Jalpy «Qaýipsiz jol» jedel-aldyn alý is-sharasy bastalǵaly 285 júrgizýshi - manevr jasaý erejesin buzǵany úshin, 119 - apattyq jaǵdaı týǵyzǵany úshin, 29 - baǵdarshamnyń qyzyl túsine ótip ketkeni úshin, 11 - qarama-qarsy jolaqqa shyqqany úshin, 35 - kólik quralyn tıisti qujattarsyz basqarǵany úshin jaýapqa tartyldy.
- Jol qaýipsizdigi – ár qatysýshynyń ortaq jaýapkershiliginiń nátıjesi. Polıtsııa qyzmetkerleri kóshelerde qaıǵyly oqıǵalardyń az bolýy úshin táýlik boıy tártip pen qaýipsizdikti qamtamasyz etedi, - dedi Jergilikti polıtsııa qyzmeti basqarmasynyń bastyǵy Serik Shýmaev.
Eske salaıyq, buǵan deıin Almatyda jol erejesin buzǵan tanymal bloger jazalanǵanyn jazǵanbyz.