Reıd:130-dan astam túrkistandyq kásipkerge aıyppul salyndy
TÚRKІSTAN. QazAqparat – Túrkistandaaǵy qoǵamdyq tamaqtaný oryndary men qonaqúıler karantın tártibin saqtamaıtyny anyqtaldy, dep habarlaıdy QazAqparat tilshisi.
Oblystyń bas sanıtar dárigeri bastap, ákimshilik, polıtsııa qyzmetkerleri men BAQ ókilderi shahardaǵy birqatar qoǵamdyq oryndardy aralap, biraz kemshilikterge kóz jetkizdi. Monıtorıng júrgizý barysynda 4 mobıldi top 20-dan astam nysanǵa baryp, birqatar quqyqbuzýshylyqtardy anyqtady.
Reıd barysynda qoǵamdyq tamaqtaný oryndary túngi 23:00-den keıin jumys istep turǵany, ondaǵy kelýshiler sany tym kóp ekeni belgili boldy. Dámhanadaǵy turǵyndar da betperde kımesten, tipti qarapaıym gıgıenalyq talaptarǵa júrdim-bardym qaraıtyny baıqaldy. Al, polıtsııa qyzmetkerlerine emin-erkin otyrǵan kópti ornynan qozǵaý qıynǵa soqty. Arnaıy top jeke-jeke eskertkennen keıin ǵana tutynýshylar oryndarynan asyqpaı turyp tarqasty. Osyndaı kemshilikterge jol bergen dámhana qojaıyndaryna qatysty ákimshilik hattamalar toltyryldy. Bazbir dámhanalarda kásipkerler mobıldi top ókilderin kórip, jaryqty sóndirip qoıǵan jáıtter oryn alǵan. Karantındik tártipke baǵynbaýshylyq faktileri qonaqúılerde de tirkeldi. Munda da qyzmetshiler betperde kımesten, kelýshilerge antıseptık sebýdi umyt qaldyrǵany anyqtaldy. Sonymen qatar SES tarapynan qoıylǵan ýaqyttan artyq qyzmet kórsetiletini belgili bolǵan. Jalpy mamandar karantın rejımi engizilgeli beri tek Túrkistan qalasynyń ózinde 130-dan astam kásipkerge qatysty aıyppul salynǵanyn aıtady. Olardyń qatarynda dámhanalar men qonaqúılerdiń qojaıyndary bar.
«Túrkistandaǵy qonaq úılerdiń birinde resepshnde otyrǵan maman qolǵapsyz, maskasyz jumys isteýde. Sonymen qatar bul jerde dezınfektsııalyq sharalar saqtalmaıdy», - deıdi Túrkistan oblystyq taýarlar men qyzmetterdiń sapasy men qaýipsizdigin baqylaý departamenti basshynyń orynbasary Aldarqul Ahmetov.
Mobıldi top ókilderi bul joly tek kásipkerler ǵana jaýapqa tarttyq dep otyr. Aldaǵy ýaqytta karantındik tártipke baǵyynbaǵany úshin jeke azamattarǵa da aıyppul salynady dep eskertti. Kásipkerlerge saqtyq sharalary saqtalmaǵan jaǵdaıda ósim kórsetkishi tómendemeıtini, bul óz kezeginde karantındik talaptardy qaıta kúsheıtýge alyp keletini túsindirildi. Ásirese, qarapaıym saqtyq sharalaryna erekshe nazar aýdarylýy tıistigi eskertildi.
Eske salaıyq, óńirdiń Bas memlekettik sanıtarııalyq dárigeri karantın rejıminiń koronavırýstyq ınfektsııa jaǵdaıy boıynsha epıdemıologııalyq ahýal turaqtanǵan kezeńge deıin jalǵasatynyn málimdegen bolatyn. Sońǵy kórsetkishter boıynsha, Túrkistan oblysynda koronavırýs juqtyrǵandar sany 400 adamnan asqan.
