Revansh: Golovkın men Alvarestiń kelissózderi aıaqtalýǵa jaqyn
ASTANA. QazAqparat - Osy aptada Golovkın men Alvares arasyndaǵy revanshty uıymdastyrýǵa qatysty kelisim rásimdelýi múmkin, dep habarlaıdy QazAqparat tilshisi.
«Golden Boy Promotion» kompanııasynyń prezıdenti Erık Gomestiń aıtýynsha, Golovkın men Alvarestiń qarymta jekpe-jegin uıymdastyrýǵa qatysty kelissózder aıaqtalýǵa jaqyn. «Biz revanshqa basymdyq berip otyrmyz. Qazirgi kezde kelissózderdi aıaqtaýǵa jaqyndap qaldyq. Sońǵy detaldar bar. Ony da retteı alamyz dep oılaımyn. Negizgi maqsatymyz - revanshty uıymdastyrý. Osy aptada kelisimge qol qoısaq, birden jarııalaımyz», - dedi E.Gomes Boxingscene.com saıtyna bergen suxbatynda.
Aıta keteıik, buǵan deıin GGG-diń promoýteri Tom Leffler de revanshqa qatysty kelissózderdiń júrgizilip jatqanyn jetkizgen bolatyn. Onyń sózine qaraǵanda, qarymta jekpe-jek ótetin oryn áli anyqtalǵan joq.
«Kelissózder sátti aıaqtalsa, revansh 5 mamyrda ótedi. Jekpe-jek qaı jerde uıymdastyrylady? Ol jaǵyn áli de pysyqtaýymyz qajet. Fanattar úlken aıqasty kórgisi keledi. Alaıda «Kanelo» jaǵynan birqatar máseleler rettelýi tıis. Sońǵy sheshimge jetemiz dep oılaımyn», - dep atap kórsetti T.Leffler.
