Revaktsınatsııa úshin Pfizer ekpesin kútýdiń qajeti joq – Narıman Tabynbaev

ALMATY. QazAqparat - Almaty qalasynyń qoǵamdyq densaýlyq basqarmasynyń basshysy Narıman Tabynbaev brıfıng barysynda qaladaǵy ózge vaktsınalar tıimdiligi jaǵynan Pfizer-den kem túspeıtinin aıtty, dep habarlaıdy QazAqparat tilshisi.

Spıker ekpe naýqanynyń qarqynyn omıkron kelgenge deıin arttyrý kerektigin aıtty.

«Qarasha aıynda Densaýlyq saqtaý mınıstrliginiń ókili bizdiń departamentke Pfizer vaktsınasy aqyly bolsa, qaladaǵy shamamen suranysty anyqtaýdy tapsyrdy. Sondyqtan emhanalarda aldyn ala jazylý júrgizildi. Mınıstrlikpen kúnde sóılesemiz, ókinishke qaraı, búgingi kúni aqyly egý úshin Pfizer vaktsınasy qashan túsetini, onyń sany men quny áli anyqtalǵan joq. Sondyqtan qańtar, aqpan aılarynda vaktsınatsııa bolady dep aıta almaımyz. Búgingi kúni qalada bar vaktsınamen revaktsınatsııa jasaýdy usynamyz, olar bizde jetkilikti. Men qalalyqtarǵa Pfizer vaktsınasyn kútpeńizder dep keńes berer edim», - dedi Narıman Tabynbaev.

Sondaı-aq ol qalada aqyly ekpe alǵysy keletinderdi tirkeý áli de jalǵasyp jatqanyn aıtty.

«Emhanalarda vaktsınany aqyly túrde alǵysy keletinder tizimi jasalyp jatyr. Búginde aqyly vaktsınatsııaǵa arnalǵan Pfizer preparaty joq, men turǵyndardy qolda bar QazVac jáne Vero Cell vaktsınasyn qaıta salýǵa shaqyramyn, olar tıimdiligi jaǵynan esh kem túspeıdi», – dep atap ótti spıker.