Revaktsınatsııa adam ımmýnıtetin kúsheıtedi - ımmýnolog
ALMATY. QazAqparat - Revaktsınatsııa adam ımmýnıtetin kúsheıtedi. Bul týraly Óńirlik kommýnıkatsııalar qyzmetiniń alańynda S. Asfendııarov atyndaǵy QazUMÝ jalpy ımmýnologııa kafedrasynyń meńgerýshisi, medıtsına ǵylymdarynyń kandıdaty Elmıra Bıtanova aıtty, dep habarlaıdy QazAqparat tilshisi.
Dárigerdiń sózinshe, alty aıdan keıin vaktsınatsııalanǵan antıdenelerdiń deńgeıi tómendeıdi, ıaǵnı aýrýdyń yqtımaldyǵy artady.
«Revaktsınatsııanyń máni – halyqtyń ımmýndyq qabatyn qoldaý. Immýndyq jaýaptyń ózindik zańdylyqtary bar. Antıgenmen ár kezdesý este saqtaý jasýshalaryn nyǵaıtady. Údetkish vaktsınatsııadan keıin ımmýnıtet kúshti bolady», - dedi ımmýnolog.
Dáriger vaktsınanyń eki dozasyn da alǵanyn, onyń egde jastaǵy anasy da vaktsınalanǵanyn atap ótti.
Sonymen qatar, ol qala turǵyndaryn tumaýǵa jáne koronavırýsqa qarsy vaktsına alýǵa shaqyrdy.
«Baqylaý nátıjeleri COVID-19 vaktsınalarynyń qorǵanys áseri tómendeýi múmkin ekenin kórsetedi. Sondyqtan ádistemelik usynystar jańa shtamdardan jetkilikti qorǵanys úshin revaktsınatsııany kórsetedi. Vaktsınalar ımmýndyq reaktsııany kúsheıtý úshin jasalady. Immýndyq júıe jattyǵady, vaktsınalar oǵan trenajer bolyp sanalady», - dep qosty Elmıra Bıtanova.
Onyń aıtýynsha, vaktsınatsııa men revaktsınatsııadan keıin ımmýnıtet aýrýdan keıingi ımmýnıtetke qaraǵanda kúshti. Bul jaǵdaıda antıdenelerdiń tıtrine nazar aýdarýdyń qajeti joq, jasýshalyq ımmýnıtettiń qanshalyqty daıyndalǵany úlken mánge ıe.
« Bul qaýipti ınfektsııa, onymen oınaýǵa bolmaıdy. Údetkish vaktsına sııaqty qural bolǵandyqtan, ony alý kerek», - dedi spıker.
Immýnolog almatylyqtardy betperde rejımin jáne basqa da belgilengen sanıtarlyq talaptardy saqtaýǵa shaqyrdy, óıtkeni qalada JRVI jaǵdaılarynyń sany kóp.
Bul ınfektsııanyń belgileri koronavırýsqa uqsas.
Spıker JRVI-men jylyna tórt ret aýyratyn eresekterdiń barynsha saq bolýy kerektigin atap ótti.
