Reuters jýrnalısi Lıvanda Izraıldiń shabýylynan qaza tapty

Juma kúni Lıvannyń ońtústigine Izraıl tarapynan jasalǵan zymyran shabýylynan Reuters agenttiginiń vıdeojýrnalısi qaza taýyp, taǵy alty jýrnalıst jaralandy, dep habarlaıdy Kazinform tilshisi Jerusalem Post basylymyna silteme jasap. 

Bir top jýrnalıst, sonyń ishinde ál Jazıra men Frans-Press agenttiginiń jýrnalısteri Izraıl shekarasyna jaqyn Alma-esh-Shaab mańynda bolǵan, bul kezde Izraıl áskerı kúshteri men lıvandyq «Hezbolla» jasaqtary shekarada atysyp jatty.

Lıvan premer-mınıstri Nadjıb Mıkatı men Hezbolla depýtaty bul oqıǵaǵa Izraıldi aıyptady.

Izraıl qorǵanys kúshteri ázirge eshqandaı málimdeme jasamady

- Árıne, biz óz jumysyn atqaryp júrgen jýrnalısterge eshqashan qastandyq jasap nemese atqymyz kelmeıtini anyq. Biraq qazir soǵys júrip jatyr, al soǵys jaǵdaıynda bári múmkin, - dedi Izraıldiń BUU-daǵy elshisi Gılad Erdan juma kúngi brıfıngte.

Ol Izraıl bıligi tergeý júrgizetinin aıtty.

Reuters agenttiginiń málimdemesinde Issam Abdalla habar taratýshylarǵa tikeleı beınesıgnal berý kezinde óltirilgeni aıtylǵan.

Qatty jarylystan kamera shaıqalyp, aýa tútindep, aıqaı estilgen kezde kamera taý bókterine baǵyttalyp qalǵan.

Reuters agenttiginiń taǵy eki jýrnalısi Taer Al-Sýdanı men Maher Naze oqıǵa kezinde jaraqat alyp, medıtsınalyq kómek alǵan soń aýrýhanadan shyǵaryldy, dep habarlady Reuters.

«Izraıldiń Ál-Jazıra komandasyna jasaǵan shabýyly - halyqaralyq qaýipsizdik standarttaryn elemeý», - delingen medıa jeliniń habarlamasynda.