Reuters: AQSh Venesýela mańyndaǵy áskerı-teńiz bazasyn jańǵyrtyp jatyr
ASTANA. KAZINFORM — AQSh Venesýeladaǵy yqtımal áskerı operatsııalarǵa arnalǵan platsdarm daıyndap jatyr. Bul týraly Reuters agenttigi alynǵan spýtnıktik sýretterge silteme jasap habarlady.
Agenttiktiń málimetinshe, 7 qyrkúıekte Pýerto-Rıkoda 20 jyldan astam ýaqyt qaraýsyz qalǵan AQSh-tyń Rýzvelt-Roýds áskerı-teńiz bazasynda qurylys jumystary bastalǵan. Onda ushý-qoný jolaǵyna aparatyn rýlejdik joldardy tazartý jáne jol jabyndysyn aýystyrý jumystary júrip jatyr. Buǵan qosa, AQSh Pýerto-Rıkoda jáne amerıkalyq Vırdjın araldarynyń quramyna kiretin Santa-Krýs aralynda azamattyq áýejaılardyń ınfraqurylymyn keńeıtip jatyr. Bul aýmaqtar Venesýeladan shamamen 500 mıl (shamamen 800 km) qashyqtyqta ornalasqan.
Vashıngton Karakasty esirtki kontrabandasyna qarsy jetkilikti belsendi kúrespeıdi dep aıyptap otyr. Osy sebepten de AQSh Karıb teńizi aýmaǵyna iri kúshterin kóshirdi. The Miami Herald gazeti habarlaǵandaı, amerıkalyq bılik Venesýela aýmaǵyndaǵy áskerı nysandarǵa soqqy jasaý týraly sheshim qabyldaǵan.
Sonymen qatar AQSh prezıdenti Donald Tramp jýrnalıstermen bolǵan áńgimede Venesýelaǵa soqqy berýdi qarastyryp jatyr nemese bul jóninde sheshim qabyldady degen boljamdardy joqqa shyǵardy.
Eske sala ketsek, AQSh eń iri áýe tasymaldaǵyshyn Venesýelaǵa jibergenin jazdyq. Onyń aldynda
amerıkalyq bombalaýshy ushaqtar Venesýelaǵa múmkindigin kórsetken edi.