Retteletin naryqta otandyq sýbektiler birqatar teńsizdikterge ushyrap otyr
ASTANA. QazAqparat - Retteletin naryqta Qazaqstannyń zańnamalary boıynsha otandyq sýbektiler reseılik sýbektilerdiń aldynda birqatar teńsizdikterge ushyrap otyr. Bul týraly búgin Astanada ótken «Tabıǵı monopolııalar men retteletin naryq sýbektileriniń qyzmetin memlekettik retteýdiń mańyzdy suraqtary: máseleler men olardy sheshý joldary» atty jyl saıynǵy forýmda «Básekelestik saıasatty qorǵaý jáne damytý ortalyǵy» AQ prezıdenti, ekonomıka ǵylymdarynyń kandıdaty Aldash Aıtjanov aıtty.
«Bizde retteletin naryqta baǵany memleket belgilep beretin birqatar salalar bar. Máselen temirjol tasymaldaryn alaıyq. Bul salada memleket baǵanyń joǵary shegin qoıyp beredi. Sýbekt TMRA-ǵa baryp, tarıfin qoıǵyzady. Sosyn ony joǵarylatýǵa nemese tómendetýge quqyǵy joq. Al reseılik sýbekt bizdiń elge kirse, oǵan ondaı talaptar qoıylmaıdy. Ol ózi qalaǵan baǵasyn qoıady. Naryqta onyń taýaryna suranys kóp bolsa, ol baǵasyn kóterip jiberedi, al kerisinshe suranys az bolsa, ol baǵasyn tómendete alady. Al bizdiń sýbektiler baǵasyn túsirý nemese kóterý úshin taǵy da TMRA-ǵa baryp, taǵy da bekittirip, qarastyryp álek bolady. Sóıtip júrgende 2-3 aı ótip ketedi de, naryq taǵy da ózgeredi», - deıdi ol.
Onyń aıtýynsha, búgingi forýmda osy jáne basqa da máselelerge baılanysty birqatar usynystar qabyldanyp, Úkimetke joldanatyn bolady. Forýmǵa múddeli memlekettik organdar ókilderi men naryq sýbektileri qatysty. «Bul eki taraptyń ózara pikir almasyp, bolashaqta QR zańnamalaryna engiziletin tolyqtyrýlar men ózgeristerdi talqylaıtyn eń úlken alań. Sondyqtan forýmǵa qatysýshylar elimizde tabıǵı monopolııalar men rettelin naryq týraly tyń jańalyqtardy Úkimet ókilderiniń óz aýzynan estı alady», - dep atap ótti A. Aıtjanov.
