Retseptisiz dári satatyn dárihanalarǵa qandaı shara qoldanylady

Densaýlyq saqtaý mınıstrligi dárilik zattar men medıtsınalyq buıymdardyń satylýyna baqylaýdy kúsheıtýdi usynyp otyr. Jańa sharalar azamattardy sapasyz jáne tirkelmegen preparattardan qorǵaýǵa, sondaı-aq dárilik zattardyń dárihanalar, market pleıster, áleýmettik jeliler jáne basqa da alańdar arqyly zańsyz satylýynyń jolyn jedel túrde kesýge baǵyttalǵan.

Osy maqsatta Densaýlyq saqtaý mınıstrligi men Ulttyq ekonomıka mınıstrliginiń birlesken buıryǵynyń jobasy ázirlendi. Qujatta dárilik zattar men medıtsınalyq buıymdardyń aınalysy salasyndaǵy qaýip dárejesin baǵalaý ólshemsharttary men tekserý paraqtaryna ózgerister engizý kózdelgen.

Usynylyp otyrǵan ózgerister memlekettik baqylaý men qadaǵalaýdyń tıimdiligin arttyrýǵa, ásirese anyqtalǵan zańbuzýshylyqtar halyqtyń ómiri men densaýlyǵyna qaýip tóndirýi múmkin jaǵdaılarǵa basymdyq berýge baǵyttalǵan. 

— Tıisti lıtsenzııasyz dárilik zattardy satýǵa, tirkelmegen, jalǵan jáne sapasyz preparattardy ótkizýge, quramynda esirtki, psıhotroptyq jáne kúshti áser etetin zattar bar dárilerdi dárigerdiń retseptisiz bosatýǵa, sondaı-aq farmatsevtıkalyq qyzmetke qoıylatyn mindetti talaptardy saqtamaýǵa erekshe nazar aýdarylady. Mundaı zańbuzýshylyqtar anyqtalǵan jaǵdaıda ýákiletti organ zańnamada kózdelgen sharalardy qabyldaı alady. Olardyń qatarynda qyzmetti ýaqytsha toqtatý, jekelegen preparattardy satýǵa tyıym salý nemese olardy aınalymnan alyp qoıý sharalary bar, — delingen mınıstrlik habarlamasynda.

Sonymen qatar dárihanalarǵa, farmatsevtıkalyq uıymdarǵa jáne naryqtyń basqa da qatysýshylaryna profılaktıkalyq tekserýler júrgizýdi josparlaý tásili jetildiriledi. Qaýip dárejesin aıqyndaý kezinde buryn anyqtalǵan zańbuzýshylyqtar, tekserý nátıjeleri, memlekettik organdardyń málimetteri, tergep-tekserý qorytyndylary jáne belgilengen talaptardyń saqtalýyn baǵalaýǵa múmkindik beretin ózge de aqparat eskeriledi.

Osylaısha, baqylaý is-sharalary eń aldymen qyzmetinde azamattardyń qaýipsizdigi men densaýlyǵyna áser etýi múmkin zańbuzýshylyq belgileri bar uıymdarǵa baǵyttalady. Bul memlekettik baqylaý resýrstaryn tıimdi paıdalanýǵa jáne naryqtaǵy adal qatysýshylarǵa túsetin negizsiz júktemeni azaıtýǵa múmkindik beredi.

Farmatsevtıkalyq naryqtyń adal qatysýshylary úshin memlekettik baqylaýdy jetildirý qyzmettiń ashyq ári biryńǵaı sharttaryn qalyptastyrýǵa yqpal etse, halyq úshin dárilik zattardy satyp alý kezinde qosymsha qaýipsizdik kepildigin qamtamasyz etedi.

Birlesken buıryq jobasy memlekettik baqylaý men qadaǵalaý salasyndaǵy zańnamany jetildirý aıasynda ázirlendi. Usynylyp otyrǵan ózgeristerdi 2027 jylǵy 1 qańtardan bastap engizý josparlanyp otyr.

Osydan buryn Densaýlyq saqtaý mınıstrligi óńirler boıynsha Call-ortalyq nómirlerin jarııalady.