Retrokólikter atyraýlyqtardyń qyzyǵýshylyǵyn týdyrdy
Atyraýdaǵy Sultan Beıbarys alańynda «West Cars» avtoklýbynyń uıymdastyrýymen retrokólikter kórmesi ótti.
Kórmege eń kóne kólikter qoıyldy.
Máselen, Nurjan Temirbaıdyń mamandyǵy – mehanık. Ol 11 jyl buryn eski kólikterdi jańalaýdy qolǵa alǵan.
«Birneshe eski kólikti qaıta qurastyrdym. Onyń ishinde Toyota motory ornatylǵan BMW, avtojarysqa arnalǵan sporttyq kólikter, mototsıkl bar. Elimizde ótetin Gorilla Drift Energy saıysy úshin BMW kóligin qurastyrýǵa 1,5 jyl ýaqytymdy jumsadym», -deıdi Nurjan Temirbaı.
Ol qurastyrǵan tehnıkanyń qatarynda «Gaz-24» markaly kóligi bar. Bul kólik zaýyttan 1963 jyly shyǵarylǵan.
Kólikti qaıta qurastyrý úshin 5 mln teńgeden astam qarjysyn salǵan.
«Bala kezimnen tehnıkany jaqsy kóremin. Oıynshyqtardy buzyp, qaıta qurastyratyn edim. Keıin kólik qurastyrýly qolǵa aldym. Volgany Oral qalasynan 300 myń teńge satyp ákeldim. Eski kólikti boıadym. Tipti kabrıolet keıpine keltirý úshin 11 sm uzarttym», -deıdi Nurjan Temirbaı.
Al, Ivan Ogýnkovtyń kóligi – 1996 jylǵy BMW. Ony 2,5 mln teńgege satyp alǵan.
«Ádette kóliktiń aq pen qara túrine suranys kóbirek bolady ǵoı. Atyraýda da aq jáne qara tústi kólikter kóp. Al, men kóligimniń ózgeshe bolǵanyn qaladym. Sol sebepten qyzyl tústi kólikke qyzyqtym. Qazir túrli kórmege qatysyp júrmin», -deıdi Ivan Ogýnkov.
Eske sala ketelik, budan buryn atyraýlyq oqýshylar sýsabynnyń jańa túrin jasap shyǵarǵanyn habarlaǵan edik.
