Retro hıtter men álemdik juldyzdar: Kóshpendiler oıyndarynda kimder án salady
ASTANA. KAZINFORM — VI Dúnıejúzilik kóshpendiler oıyndaryna qatysatyn ónerpazdar quramy jarııalandy, dep habarlaıdy Kabar.
VI Dúnıejúzilik kóshpendiler oıyndarynda birqatar sheteldik juldyz, hedlaınerler men álemge tanymal ónerpazdar óner kórsetedi. Bul týraly Cholpon-Ata qalasynda ótken brıfıngte Dúnıejúzilik kóshpendiler oıyndarynyń mádenı baǵdarlamasynyń bas rejısseri Altynbek Maksýtov málimdedi.
Onyń aıtýynsha, ónerpazdar quramy qazirgi jastardan bastap aǵa býynǵa deıingi barlyq jastaǵy kórermenderdiń qyzyǵýshylyǵy eskerilip jasaqtalǵan.
Kontsert alańdarynda, sondaı-aq oıyndardyń ashylý jáne jabylý saltanattarynyń prologtarynda qyrǵyzstandyq ónerpazdarmen birge nıderlandtyq ánshi Eva Simons, frantsýzdyq Gipsy Kings pop-toby, nemis ánshisi Haddaway, ekvadorlyq mýzykant Leo Rojas, reseılik ánshi Dmıtrıı Koldýn, ázerbaıjandyq ánshi Roza Zergerlı, Bashqurtstannan kelgen Ay Yola mýzykalyq trıosy jáne ıakýtııalyq «Kyl Saha» men «Aıarhan» ansamblderi óner kórsetedi.
Qurmetti qonaqtar men Oıyndardyń elshileri retinde Gollıvýd akteri Don «Drakon» Ýılson, amerıkalyq aktrısa Baı Lın, teatr jáne kıno aktrısasy Natalıa Arınbasarova, sondaı-aq «Oskar» syılyǵynyń laýreaty, kınorejısser Zbıgnev Jmýdskıı qatysady.
Altynbek Maksýtovtyń aıtýynsha, sheteldik qonaqtardyń saparyna bıýdjet qarajaty jumsalǵan joq. Álemdik deńgeıdegi juldyzdar Dúnıejúzilik kóshpendiler oıyndaryn qoldaý úshin óz bastamalarymen keldi, sondaı-aq olardyń saparyna demeýshiler qarjylaı qoldaý kórsetti.
Budan buryn búgin Sholpan-Ata qalasynda VI Dúnıejúzilik kóshpendiler oıyndary aıasynda ótetin kókbóri jáne kókpar týrnırlerine qatysatyn komandalardyń jerebesi tartylǵanyn jazǵan edik.
