ReStart jobasy: bıyl 60 tonnadan astam plastık jınaldy
ASTANA. KAZINFORM — Elordada jastar arasynda ekologııalyq mádenıetti qalyptastyrýǵa baǵyttalǵan ReStart jobasynyń onynshy mereıtoılyq maýsymy qorytyndylandy.
Bıyl jobaǵa elimizdiń 23 joǵary oqý orny men 220 myńnan astam stýdent qatysty. Joba aıasynda Qazaqstannyń onnan astam óńirinde ekologııalyq aktsııalar, trenıngter men senbilikter uıymdastyryldy. Іs-sharalardyń bir bóligi respýblıkalyq «Taza Qazaqstan» aktsııasy sheńberinde ótti.
Qatysýshylar qaldyqtardy bólek jınaý jáne qaıta óńdeý baǵytynda bilim alyp, nátıjesinde 60 tonnadan astam plastık jınady.
QR Ekologııa jáne tabıǵı resýrstar vıtse-mınıstri Jomart Álıevtiń aıtýynsha, jastardyń bastamalary eldegi ekologııalyq saıasatty damytýǵa tyń serpin beredi.
— ReStart — biregeı joba. Jastar men oqytýshylar qaýymy qoǵamdaǵy eń belsendi ári jańashyl ortanyń biri sanalady. Stýdenttik ortada dúnıege keletin bastamalar ekologııalyq saıasatty damytýǵa tyń serpin beredi. Mınıstrlik mundaı bastamalardy tolyq qoldaıdy. Biz bul jobamen jáne osyǵan uqsas ózge de bastamalarmen belsendi yntymaqtastyq ornatyp kelemiz. Qazir ár azamattyń boıynda ekologııalyq mádenıet pen ekologııalyq oılaý daǵdysyn qalyptastyrý mańyzdy mindetke aınaldy, — dedi QR Ekologııa jáne tabıǵı resýrstar vıtse-mınıstri.
«Jasyl ekonomıka» jáne G-Global-dy damytý koalıtsııasy basqarma tóraǵasy Álııa Rahymbekovanyń aıtýynsha, ReStart jobasy jyldar óte kele stýdentter arasyndaǵy baıqaýdan jastardyń ekologııalyq mádenıetin damytýǵa arnalǵan aýqymdy alańǵa aınalǵan.
— Búginde ReStart jaı ǵana joǵary oqý oryndary arasyndaǵy baıqaý emes. Bul — stýdentter naqty ekologııalyq sheshimder ázirleýdi úırenetin alań. Munda usynylǵan bastamalar joba aıaqtalǵannan keıin de jalǵasyn tabady. ReStart elimizdiń túkpir-túkpirindegi jastardy biriktirip, qorshaǵan ortaǵa jaýapkershilikpen qaraý mádenıetin qalyptastyrýǵa yqpal etip keledi, — dedi ol.
Álııa Rahymbekova joba qatysýshylary is-sharalar aıaqtalǵannan keıin de ekologııalyq bastamalarǵa belsendi aralasatynyn atap ótti. Onyń aıtýynsha, stýdentter oqý jyly boıy plastık qaldyqtaryn jınap, ekologııalyq trenıngter men túrli aǵartýshylyq is-sharalar ótkizedi.
Jobanyń tıimdiligi jınalǵan plastık kóleminiń jyldan-jylǵa artýynan baıqalady. Eger segizinshi maýsymda qatysýshylar 17 tonnadan astam qaldyq jınasa, toǵyzynshy maýsymda bul kórsetkish 35 tonnaǵa jetken. Al bıyl jınalǵan plastık kólemi eki esege jýyq ósip, 60 tonnadan asty.
Mereıtoılyq maýsym jeńimpazdary saltanatty marapattaý rásiminde anyqtaldy. ReStart jobasynyń onynshy maýsymyndaǵy bas júlde — quny 5 mıllıon teńge bolatyn jabdyq — Qorqyt ata atyndaǵy Qyzylorda ýnıversıtetine berildi.
Sondaı-aq jobaǵa belsendi qatysqan kýratorlar uıymdastyrýshylar tarapynan 200 myńnan 500 myń teńgege deıingi syıaqymen marapattaldy.
Aıta keteıik, buǵan deıin Qazaqstan UOK-niń ECO Athlete jobasy aıasynda ótken úshinshi ekologııalyq aktsııa barysynda 700 keliden astam qoqys jınalǵan bolatyn.
