Reseılik qazaq «Jańa tolqyn» ánshiler baıqaýynda baq synaıdy
MÁSKEÝ. KAZINFORM — 21 tamyz kúni Qazan qalasynda (Tatarstan, Reseı) halyqaralyq «Jańa tolqyn» («Novaıa vonla») ánshiler baıqaýy bastaldy, fınalısteri qatarynda Danıal Jumaqanov ta (Jummy) bar.
Danıal Ekaterınbýrg qalasynan, ákesi — qazaq, anasy — orys. 13 jasynan bastap ózi án jazyp, aranjırovka jasaıdy. Ol - Máskeýdegi Qazirgi zamanǵy óner ınstıtýtynyń stýdenti. Reseı Jastar odaǵy uıymdastyrǵan «Reseılik stýdenttik kóktem» jobasynda jeńimpaz atanyp, «Jańa tolqyn-2025» halyqaralyq jas oryndaýshylar baıqaýyna joldama alǵan.
2023 jyly ol «Reseılik stýdenttik kóktem» jobasy aıasynda Cheboksar qalasynda ótken avtorlyq ánderdiń Búkilreseılik Ispolnıaı atty jastar festıvaline qatysqan.
2025 jyly Danıal Máskeýdiń «eń úzdik daýysy» atanyp, «Stýdvesna. Golos» arnaıy jobasynda jeńiske jetti. Nátıjesinde Reseılik stýdenttik kóktemniń aımaqtyq kezeńine joldama ıelendi.
Qazanda ótetin baıqaýdyń bas júldesi úshin alty eldiń ókilderi baq synaıdy. Reseıden 7 oryndaýshy, Qazaqstannan eki ánshi — Yernazar jáne Alex Lim qatysady.
Eske salsaq, «Jańa tolqyn-2025» — jyldyń basty mýzykalyq oqıǵalarynyń biri. Ashylý saltanatyna Reseı jáne shetel estrada juldyzdary qatysady. Baıqaýdyń saltanatty jabylýy 2025 jyldyń 26 tamyzynda ótedi.
«Jańa tolqyn» festıvali — 2002 jyly Igor Krýtoı men Raımond Paýls negizin qalaǵan jas oryndaýshylardyń halyqaralyq pop-mýzyka baıqaýy. Alǵashqy jyldary (2002–2014 jj.) ol Latvııanyń ıÝrmala qalasynda ótti, keıin Sochıde (2015–2019 jj.) uıymdastyryldy, al 2021 jyldan bastap Reseıdiń Sırıýs qalasynda ótip júr. 2025 jyly festıval alǵash ret Qazanda ótpek.
Festıval bastapqyda jańa talanttarǵa arnalǵan alań retinde qurylyp, ýaqyt óte kele eń iri mýzykalyq oqıǵalardyń birine aınaldy. Jyl saıyn túrli eldiń oryndaýshylary qatysady. Baıqaý birneshe kúnge sozylady, qatysýshylar óz ánderin, álemdik hıtterdi jáne avtorlyq kompozıtsııalaryn oryndaıdy. Qazylar alqasy olardyń ónerin baǵalaıdy.