Respýblıkashyl partııanyń sezi bastaldy

ASTANA. QazAqparat - AQSh-tyń Ogaıo shtatyndaǵy Klıvlend qalasynda Respýblıkashyl partııanyń sezi jumysyn bastady. Sezd tórt kúnge sozylady.

Jıynda Donald Tramp Respýblıkashyl partııa atynan 8 qarashada ótetin prezıdent saılaýyna kandıdat bolyp resmı túrde usynylady dep kútilýde. Klıvlendidegi sezge partııanyń eki myńnan astam delegaty qatysýda. Jıynnyń sońǵy kúni D.Tramptyń sóz sóıleýi belgilengen. Tramptyń saılaýaldy kampanııasynyń menedjeri Pol Manaforttyń habardar etýinshe, «saıasatkerdiń maqsaty - Amerıka halqyna Donald Trampty tek kandıdat retinde ǵana emes, adam retinde tanýlaryna kómektesý». Sonymen qatar, sezde elge belgili birqatar saıası qaıratkerler de sóz sóılemek. Jergilikti polıtsııa jıyn ótetin aýdanda narazylyq aktsııasy bolýy múmkin ekenin aıtady. Al Demokratııalyq partııanyń sezi kelesi aptada Fıladelfııada ótedi. Onda demokrattar Hılları Klıntondy prezıdenttikke kandıdat etip usynady.

Ushaqty atyp túsirgender qamaýǵa alyndy

Túrkııa bıligi ótken jyldyń qarashasynda Reseıdiń bombalaýshy Sý-24 ushaǵyn atyp túsirgen eki ushqyshty qamaýǵa aldy.

«Blýmbergtiń» Túrkııanyń joǵary shendi sheneýniginiń aıtqanyna silteme jasaý arqyly habarlaýynsha, áskerı ushqyshtar Sırııa shekarasynyń mańynda qamaýǵa alynǵan. Reseı men Túrkııa arasynda salqyndyq ótken jyldyń 24 qarashasynda Túrkııanyń joıǵysh ushaǵy Sırııanyń shekarasy janynda Reseıdiń bombalaýshy ushaǵyn atyp túsirgennen keıin bastalǵan-dy. Reseı basshysy bul oqıǵany «tý syrtynan jasaǵan soqqy» dep atady. Osy jaǵdaıdan soń Reseı tarapy Túrkııaǵa birqatar ekonomıkalyq shekteýler qoıdy. Budan túrik aǵaıyndar kádimgideı zııan shekti. Qazir eki el arasyndaǵy saýda-ekonomıkalyq baılanys qaıta qalpyna kele bastaǵandaı.

Terrorshyl uıymnyń múshesi ekeni anyqtaldy

Baltamen jáne pyshaqpen qarýlanyp, Germanııanyń Bavarııasynda jolaýshylar poıyzyna shabýyl jasaǵan 17 jastaǵy aýǵandyq «Islam memleketi» terrorshyl tobynyń múshesi bolyp shyqty.

Birqatar agenttikterde ornalastyrylǵan aqparattar boıynsha, onyń páterin tintý kezinde atalǵan ekstremıstik uıymǵa qatysy barlyǵyn aıǵaqtaıtyn qujattar tabylǵan. Qujattar alynyp, taldaý jasaý úshin tıisti oryndarǵa berilgen. Bavarııanyń ishki ister mınıstri Ioahım Herrmann keshe aýǵandyq jalǵa alǵan páterden «Islam memleketiniń» jalaýy tabylǵanyn málimdedi. Qaskúnemniń shabýylynan tórt jolaýshy jaralandy. Oqıǵa ornyna jetken polıtseıler ony boı tasalamaq bolǵanda atyp óltirgen.

Qysqa qaıyryp aıtqanda:

• Ulybrıtanııanyń jańa premer-mınıstri Tereza Meı óziniń parlament aldynda sóıleıtin alǵashqy sózinde «Traıdent» zymyranymen jabdyqtalǵan atom súńgýir qaıyqtaryn jetildirý máselesin qoımaq.
• Túrkııa premer-mınıstri Bınalı Iyldyrym elde qarýly tóńkeris jasamaq áreketi barysynda 208 adamnyń mert bolǵanyn málimdedi. Sondaı-aq, ol 7543 adamǵa búlikke qatysy bar degen kúdik keltirip otyrǵanyn jáne olardyń ishinde 316 adamnyń tutqyndalǵanyn habarlady.
• Soltústik Koreıa Japon teńizine qaraı úsh ballıstıkalyq zymyran ushyrdy. Kórshisi Ońtústik Koreıanyń áskerıleri bul zymyrandardyń eldegi kez kelgen nysanǵa dál tıe alatynyn aıtady.
• Tájikstan joǵary sotynyń tóraǵasy Sh.Shohıen eldiń qorǵanys mınıstriniń burynǵy orynbasary A.Nazarzoda basqarǵan búlikke qatysty isti qaraý aıaqtalǵanyn habarlady. Osy is boıynsha kúsh qurylymdarynyń 10 sheneýnigine aıyp taǵylyp otyr.

Qala 350 myń dollarǵa satylady

Internette Djeıms Djonson degen adam AQSh-taǵy Kebın-Krık qalasyn 350 myń dollarǵa satyp alýdy usyndy. Djonson ózin osy qalanyń ıesimin dep atapty.

Eger qala satyla qalǵan jaǵdaıda, ony satýshy aqshany qaltasyna basyp, álem elderin aralaýǵa shyqpaqshy eken. Ótken ǵasyrdyń jetpisinshi jyldarynda Kebın-Krık qalasynda kisi óltirý oqıǵalary jıi bolypty. Sodan úreılengen qala turǵyndary eldiń ózge óńirlerine qonys aýdarǵan kórinedi. Sol kezden beri shahar qańyrap bos qalǵan, adam turmaıdy. Degenmen, ondaǵy ǵımarattar men turǵyn úıler jaqsy saqtalypty. Ondaǵy dúkender men dámhana, meıramhanalar ornalasqan oryn-jaılar sol qalpynda búlinbeı áli tur. Alǵashynda D.Djonson bos qalǵan qalany attraktsıonǵa aınaldyrmaq bolypty, onyń reti kelmegen. Endi Denver qalasynan 45 mınýttaı jol júrip jetetin qala óziniń jańa qojaıynyn kútýde.

Vıtse-mınıstr qyzmetinen nege shettetildi?

Reseı sport mınıstriniń orynbasary ıÝrıı Nagornyh qyzmetinen ýaqytsha shettetildi. El úkimetiniń tóraǵasy osyndaı sheshim qabyldaǵan.

Reseılik agenttikterdiń aqparattaryna qaraǵanda, ıÝ.Nagornyh sport qurama komandalaryn medıtsına-bıologııalyq, medıtsına-sanıtarlyq jáne medıtsınalyq jaǵynan qamtamasyz etýge jaýapty bolǵan. Budan eki kún buryn Reseı prezıdenti V.Pýtın Dúnıejúzilik dopıngke qarsy agenttik (BADA) komıssııasynda aıtylǵan jalǵan dopıng synamasyn jasatty degen laýazym ıesi tergeý tolyq aıaqtalǵansha qyzmetinen ýaqytsha shettetilgenin málimdegen edi. V.Pýtın antıdopıng agenttigi taqqan aıypty teriske shyǵarmady. Biraq, aıypty «sportty geosaıası qysym quraly etý áreketi» retinde baǵalady. Ótken dúısenbide WADA óziniń esebin jarııalap, Reseıdiń dopıngke qarsy zerthanasy sportshylardyń tyıym salynǵan preparattardy qoldanǵany týraly synamasyn ádeıi jasyrdy degen. Osylaısha, agenttik reseılik sportshylardy barlyq halyqaralyq jarystarǵa qatysýdan shettetýge shaqyryp otyr.

26 týrıstiń altaýy ǵana tiri qaldy

Taıvanda bolǵan jol-kólik apaty saldarynan 20-dan astam adam opat boldy. Apat halyqaralyq áýejaıǵa baratyn kúre jolda oryn alǵan.

Qutqarýshylardyń aıtýynsha, negizinen qytaılyq týrıster mingen avtobýs jol jıegindegi qorshaýǵa soǵylǵan, artynsha kólik otqa oranǵan. Oqıǵa ornyna jetken qutqarýshylar 26 adamnyń altaýyn ǵana shyǵaryp úlgeripti. Osy jyldyń maýsymynda Qytaıdyń Hýnan provıntsııasynda bolǵan jol-kólik apatynan avtobýstaǵy 56 adamnyń 35-i órttiń qurbany bolǵan edi.

Internet materıaldary negizinde ázirlendi