Respýblıkanyń úsh oblysynda joldar jabyq kúıinde qalýda
ASTANA. QazAqparat - Respýblıkanyń úsh oblysynda avtokólik qozǵalysyna shekteý qoıyldy. Bul týraly QR ІІM TJ komıtetinen habarlady.
Qaraǵandy oblysynda erigen qar sýynyń tasýy saldarynan 13 sáýirden beri «Qaraǵandy-Aıagóz-Buǵaz» respýblıkalyq mańyzy bar avtojolynyń 139, 141 jáne 169-shaqyrymdary (17-215 shaqyrym aralyǵy, Qaraǵandydan Qarqaralyǵa deıin) barlyq avtokólik túrleri úshin jabyq tur.
Soltústik Qazaqstan oblysynda erigen qar sýynyń tasýy saldarynan 16 sáýir kúni «Jezqazǵan-Petropavl» (671-700 shaqyrym aralyǵy, Toqsan bı - Novoıshımskoe aýyldary), «Ekaterınbýrg-Almaty» (729-768 shaqyrym aralyǵy, Qostanaı oblysynyń shekarasy - Toqsan bı) avtojoldarynda barlyq avtokólik túrleri úshin qozǵalys toqtatyldy.
Sondaı-aq Qostanaı oblysynda erigen qar sýynyń tasýy saldarynan 16 sáýir saǵat16:00-de «Ekaterınbýrg-Almaty» (686-729 shaqyrym aralyǵy, Sarykól aýyly - SQO shekarasy) respýblıkalyq mańyzy bar tasjolynda barlyq avtokóliktiń qozǵalysyna tyıym salyndy.
